შსს: აბასთუმანში ხანძარი სრულად ლოკალიზებულია, დაკვამლიანებაც აღარაა

"ლოკალიზებლია სრულად, დაკვამლიანებაც აღარ არის, მიმდინარეობს სამუშაოები სრულად ლიკვიდაციისთის. ასევე, ცოცხალი ძალა გადასულია ნიადაგის პრევენციულ დამუშავებაზე. ეფექტურად იმუშავა ავიაციამ ცოცხალ ძალასთან ერთად. ამ ეტაპზე შეიძლება ითქვას, რომ მთელს ზონაში, სადაც ხანძარი იყო, სრულად ლოკალიზება გვაქვს", – განაცხადა მინისტრმა ჟურნალისტებთან.

მისივე თქმით, ბოლო ორი საათია აბასთუმანში ავიაცია აღარ მუშაობს, მაგრამ, ჯერჯერობით რჩება ადგილზე: "რადგან ქარია და შეიძლება ქარმა გარკვეულ ლოკაციებზე გააღვივოს ცეცხლი, მაგრამ, ამ ეტაპზე ამის საშიშროება არ გვაქვს".

შეგახსენებთ, ბორჯომ–ხარაგაულის ეროვნული პარკის აბასთუმნის უბანში ხანძარი 29 აგვისტოს გაჩნდა. ცეცხლი მიუვალ, შერეულ ტყეში იყო. ხანძრის ჩაქრობას ართულებდა რთული რელიეფი, ქარი და ნისლი.

შსს–ს ინფორმაციით, ხანძრის ქრობის პროცესში ჩართული იყო შსს-ს საგანგებო სიტუაციების მართვის სააგენტოს, განაკუთრებულ დავალებათა დეპარტამენტის, საპატრულო და კრიმინალური პოლიციის, ასევე, დაცული ტერიტორიებისა და ეროვნული სატყეო სააგენტოების 1000-ზე მეტი თანამშრომელი, ასევე, მოხალისეები აბასთუმნიდან. ხანძრის კერებამდე სახანძრო ტექნიკის მისაყვანად ტყეში გაიჭრა 6 კილომეტრამდე გზა.

უწყების განცხადებით, ადგილზე რჩება ცოცხალი ძალა და ხანძარსაწინააღმდეგო ტექნიკა. ხანძრის სალიკვიდაციო სამუშაოები უწყვეტ რეჟიმში გრძელდება.


[sknews.ge]