შს მინისტრი მოხალისეებზე: მე ასეთი სულისკვეთება, ვერცერთ რეგიონში ვერ ვნახე

მინისტრის განცხადებით, ამ ეტაპზე, სტიქიის ზონაში, 1500–მდე ადამიანი მუშაობს და მათ შორის, არიან ადგილობრივებიც.

"ადგილობრივებმა ძალიან კარგად იციან აქაური ლანდშაფტი და მე მინდა მათ ძალიან დიდი მადლობა გადავუხადო იმისათვის, რომ თავდაუზოგავად იბრძვიან ხანძრის ჩასაქრობად. მე ასეთი სულისკვეთება ნამდვილად ვერცერთ რეგიონში ვერ ვნახე, რაც აქ დავინახე", – განაცხადა გიორგი მღებრიშვილმა დღეს, 31 აგვისტოს, დილას, ჟურალისტებთან აბასთუმანში არსებული ვითარების შეჯამებისას.

შეგახსენებთ, მესამე დღეა აბასთუმანში ხანძარს ებრძვიან. ადგილზე ცოცხალი ძალა, სახანძრო ტექნიკა და ავიაცია მუშაობს. ხანძარი ბორჯომ-ხარაგაულის ეროვნული პარკის აბასთუმნის უბანზეა გაჩენილი, მიუვალ, უღრან ტყეში. ხანძრის ჩაქრობას ართულებს რთული რელიეფი და ქარი. ამ დროისათვის უცნობია რა ფართობზეა მოდებული ცეცხლი. საქართველომ დახმარება მეგობარ ქვეყნებს სთხოვა. დღეიდან, 31 აგვისტოდან, სალიკვიდაციო სამუშაოებში ერთვება 5 ვერტმფრენი და 1 თვითმფრინავი. დღეს მინისტრმა განაცხადა, რომ ცეცხლის ღია კერები ჩამქრალია და თუ ამინდი ხელს შეუწყობთ, საღამოს ხანძარი ლოკალიზებული იქნება.

[sknews.ge]