ბორჯომში, სტიქიის ზონაში, სამუშაოები განახლდა

სტიქიის ზონაში, საგანგებო შტაბის დავალებით, სხვადასხვა უწყებები მთელი ღამის განმავლობაში მუშაობდნენ. ადგილზე რჩებოდნენ შსს–ს თანამშრომლები და მეხანძრე–მაშველებიც.

საგანგებო სიტუაციების მართვის სამსახურში ამბობენ, რომ დღეს, 23 აგვისტოს დილიდან 1000–მდე ცოცხალი ძალა, სტიქიის ზონაში უკვე გადანაწილებულია და ცეცხლის ჩაქრობის პროცესი მიმდინარეობს.

ამ დროისათვის უკვე ბორჯომში არიან სომხეთიდან და აზერბაიჯანიდან გამოგზავნილი მეხანძრე–მაშელები და ცეცხლის ქრობის პროცესში ისინიც მონაწილეობენ.

რაც შეეხება ავიაციას, საგანგებო სიტუაციების მართვის სამსახურში ამბობენ, რომ დღის ბოლომდე კიდევ ერთი, მეშვიდე ვერტმფრენი დაემატება.

მათივე ინფორმაციით, ამ დროისათვის სტიქის ზონაში ქარი არ არის და არც ღია ცეცხლი ფიქსირდება, უწყებაში იმედოვნებენ, რომ ცეცხლის ქრობის პროცესს ხელს ამინდიც შეუწყობს.

საგანგებო რეჟიმში მუშაობს სტიქიის სალიკვიდაციო სამუშაოებთან დაკავშირებით შექმნილი, საგანგებო შტაბი და ადგილზე იმყოფებიან ქვეყნის პრემიერ–მინისტრი, შინაგან საქმეთა და ინფრასტრუქტურის მინისტრები, ასევე სხვა უწყებების წარმომადგენლები.

დილიდან საგანგებო თათბირი გამართა, შს მინისტრმა გიორგი მღებრიშვილმა, რომელმაც რეგიონის გუბერნატორთან აკაკი მაჭუტაძესთან და სხვა უწყებების წარმომადგენლებთან ერთად, ბორჯომის ხეობაში გაჩენილი ხანძრის სალიკვიდაციო სამუშაოების დეტალური გეგმა განიხილა.

[sknews.ge]