ბორჯომის ხეობაში ვერტმფრენებმა მუშაობა დილამდე შეაჩერეს

დღის განმავლობაში ბორჯომში, სტიქიის ზონაში, ხანძრის სალიკვიდაციო სამუშაოებში ერთი აზერბაიჯანული და ორი ქართული ვერტმფრენი იყო ჩართული. საღამოს, სამაშველო ოპერაციაში ჩაერთო ორი თურქული ვერტმფრენიც.

გარდა ამისა, დღის განმავლობაში ადგილზე მუშაობდა და ახლაც მუშაობს: 400–ზე მეტი მეხანძრე–მაშველი, მოხალისეები, ადგილობრივები და შსს-ს განსაკუთრებულ დავალებათა დეპარტამენტის 550–მდე თანამშრომელი. სტიქიის ზონაში მობილიზებულია ათობის სახანძრო და მძიმე ტექნიკა საქართველოს სხვადასხვა რეგიონიდან.

ხვალიდან, 23 აგვისტოდან ცეცხლის ჩაქრობას 6 ვერტმფრენით შეეცდებიან. უკვე მომუშავე ხუთ ვერტმფრენს შეუერთდება ბელარუსის საგანგებო სიტუაციების სამინისტროს კუთვნილი სახანძრო ვერტმფრენი МИ-26, რომელიც საქართველოში ბორტზე მყოფ 10 მაშველთან ერთად გამოფრინდა.

საგანგებო სიტუაციების მართვის სააგენტოს განცხადებით, ყველა დასახლებულ პუნქტში ისინი მთელი ღამის განმავლობაში იმუშავებენ და პრევენციულ ღონისძიებებს გაატარებენ.

„ყველა ღონეს ხმარობენ, ეს არის ნიადაგის დასველება, ნიჩბებით და მათრახებით მუშაობა“, – აცხადებენ სააგენტოში.

[sknews.ge]