საქართველოს ბელარუსული ვერტმფრენიც დაეხმარება

უწყების ცნობით, 2017 წლის 22 აგვისტოს საქართველოს მთავრობის მიმართვის საფუძველზე საქართველოში ბორჯომის ტყის მასივის ხანძრის ლიკვიდაციაში ჰუმანიტარული დახმარების მიზნით, ბელარუსის პრეზიდენტის დავალებით, ბელარუსის საგანგებო სიტუაციების სამინისტროს კუთვნილი სახანძრო ვერტმფრენი МИ-26, ბორტზე მყოფ 10 მაშველთან ერთად გამოფრინდა საქართველოში.

"ბელარუსის საგანგებო სიტუაციების სამინისტროს კუთვნილი МИ-26, რომელიც ტვირთამწეობით გახლავთ მსოფლიოში ყველაზე დიდი ვერტმფრენი, საქართველოში ჩაფრინდება უახლოეს საათებში", – ნათქვამია უწყების განცხადებაში.

გარდა ამისა, საქართველოს შინაგან საქმეთა სამინისტროს სსიპ საგანგებო სიტუაციების მართვის სააგენტოს ინფორმაციით, სომხეთმა საქართველოს დასახმარებლად 13 ერთეული სახანძრო–სამაშველო ტექნიკა, აქედან 4 მაღალი გამავლობის მანქანა გამოყო. მათივე ინფორმაციით, სამუშაოებში სომხეთიდან 65 მეხანძრე–მაშველი ჩაერთვება. შსს-ს ინფორმაციით, სომხეთიდან სამაშველო ძალებმა საზღვარი უკვე გადმოკვეთეს და საქართველოში იმყოფებიან.

ბოლო მონაცემებით, ბორჯომის ხეობაშია ორი თურქული ვერტმფრენი. ამ დროისთვის ბორჯომის ხეობაში ჯამში 5 ვერტმფრენი მუშაობს, – ორი ქართული, ორი თურქული და ერთი აზერბაიჯანული.



[sknews.ge]