უნივერსიტეტის ეკო-კლუბმა ორწლიანი მუშაობა შეაჯამა

ეკო-კლუბი უნივერსიტეტის ბაზაზე ორი წლის წინ შეიქმნა. პრეზენტაციაზე ეკო-კლუბის წევრებმა მათ მიერ ორი წლის განმავლობაში განხორციელებულ აქტივობებზე ისაუბრეს.

”ერთ-ერთი წარმატებული პროექტი იყო ”ნარჩენების რეციკლირება”, რომელიც mercy corps-ის დაფინანსებით განვახორციელეთ. პროექტის იდეა ტაივანელ მოხალისეს ფეინგ ჰანგის ეკუთვნის. ამ პროექტის ფარგლებში ქალაქში, 10 ადგილას დავდგით ყუთები, სადაც მოსახლეობას ნარჩენების ჩაყრა შეუძლია”, - ამბობს ეკო-კლუბის პრეზიდენტი მარიამ ზაზაძე.

ამავე პროექტის ფარგლებში და სამცხე-ჯავახეთის სახელმწიფო სასწავლო უნივერსიტეტის დახმარებით, დაიბეჭდა 200 ეგზემპლარი ქართულ-ინგლისური და ინგლისურ-ქართული ეკო ლექსიკონი.

’ეს ლექსიკონები იმ მოსწავლეებს და სტუდენტებს გადაეცემათ, ვინც ეკოლოგიის საკითხებით არიან დაინტერესებული”, - ამბობს ზაზაძე.

პრეზენტაციის ბოლოს აჩვენეს ვიდეო-რგოლი იმის შესახებ, როგორ უნდა გადამუშავდეს ნარჩენები.

[ნუკა სტეფნაძე, ახალციხე]