სამცხე-ჯავახეთის უნივერსიტეტის პედაგოგებმა გადამზადება გაიარეს

ევროკავშირის მიერ დაფინანსებული პროექტი „ინდივიდუალური საჭიროების მქონე ადამიანების საზოგადოებაში ინტეგრირება“ (ASPIRE) მიზნად ისახავს განსაკუთრებული საჭიროების მქონე ინდივიდების უფლებების გაძლიერებას განათლების ხელმისაწვდომობისა და საზოგადოებრივ ცხოვრებაში მონაწილოების მიმართულებით.

საქართველოში აღნიშნულ პროექტს ილიას სახელმწიფო უნივერსიტეტი და მისი პარტნიორი უნივერსიტეტები ახორციელებენ. პროექტის ფარგლებში დაგეგმილია სხვადასხვა საგანმანათლებლო ტრენინგ-პროგრამები, ასევე საზოგადოების ცნობიერების დონის ამაღლება განსაკუთრებული საჭიროების მქონე პირების განათლების უფლებებსა და მეთოდებზე.

„ირლანდიაში პედაგოგებს სამკვირიანი ტრენინგები ჩაუტარდათ, ახლა კი ჩვენ ჩამოვედით და ვაკვირდებით მოდულების პილოტირებას. არც თუ დიდი ხანი გავიდა, მაგრამ ძალიან ბევრი რამ გაკეთდა და დიდი შრომა ჩაიდო, ჩვენ კმაყოფილები ვართ“, - ამბობს ირლანდიაში, ლიმერიკის ტექნოლოგიის ინსტიტუტის ბიბლიოთეკის ხელმძღვანელი ჯორელდ ქავანა.

გადამზადებული პედაგოგები სტუდენტებს ასწავლიან თუ როგორ უნდა იმუშაონ ისეთ კლასში, ან აუდიტორიაში, სადაც სპეციალური საჭიროების მქონე მოსწავლეები სწავლობენ.

„პროექტის მიზანია, რომ ხელი შეუწყოს უნივერსიტეტების მზაობის ჩამოყალიბებას,რათა შეღწევადი გახდეს უნივერსიტეტი სპეციალური საჭიროების მქონე ადამიანებისთვის. პროექტი სხვადასხვა კომპონენტებისგან შედგება. ერთ-ერთი ისაა, რომ შეიქმნას სასწავლო მოდული, რომლის საშუალებითაც უნივერსიტეტის კურსდამთავრებულებს, განსაკუთრებით მომავალ მასწავლებლებს, წარმოდგენა ქონდეთ რა არის სხვადასხვა საჭიროების მქონე მოსწავლეებთან მუშაობა. უნდა შეიცვალოს ბიბლიოთეკის პოლიტიკაც, ისე, რომ უფრო მიმღები გახდეს სხვადასხვა საჭიროებების მქონე სტუდენტებისთვის“,- ამბობს ლიმერკის ტექნოლოგიის ინსტიტუტის ბიბლიოთეკარი ფოდრიკ ქერბი.

აღნიშნული პროექტი 2012 წლის 15 ოქტომბერს დაიწყო და სამ წელიწადს გაგრძელდება.

სამცხე-ჯავახეთის სახელმწიფო სასწავლო უნივერსიტეტიდან პროექტის ფარგლებში ოთხი პედაგოგი გადამზადდა პროექტის ინსტიტუციური კოორდინატორის თინათინ გელაშვილის განმარტებით, პროექტის დადებითი მხარეა ისიც, რომ გარდა გადამზადებული პედაგოგებისა, უნივერსიტეტი სპეციალური ტექნიკითაც აღიჭურვა.

[თინათინ ზაზაძე, ახალციხე]