დაბის ტერიტორიაზე ხანძარს ვერ აქრობენ

სამცხე–ჯავახეთის ათამდე სახანძრო ჯგუფი და ასამდე მეხანძრე, უკვე რამდენიმე საათია ბორჯომში, სოფელ დაბის მიმდებარე ტერიტორიაზე გაჩენილი ხანძრის ჩაქრობას ცდილობს.

ცეცხლი ამ ეტაპზე, 2014-2017 წლებში აღდგენილი ტერიტორიების ზემოთ არსებულ ფერდობზეა გავრცელებული.როგორც, საგანგებო სიტუაციების მართვის სამსახურში განმარტავენ, ცეცხლის ჩაქრობის პროცესი ჯერ კიდევ ძირითად კერებზე მიმდინარეობს.

ხანძრის ჩაქრობას ტექნიკისთვის მიუდგომელი ადგილი და ძლიერი ქარიც ართულებს. უკვე რამდენიმე საათია ადგლზე სასაზღვრო პოლიციის ვერტმფრენიც მუშაობს.

ამ დრომდე მეხანძრეებთან ერთად ადგილზე მობილიზებულები არიან ეროვნული სატყეო სააგენტოს სამცხე-ჯავახეთის სატყეო სამსახურის თანამშრომლები, პოლიცია, სამაშველო სამსახური და სოფელ დაბისა და წაღვერის მცხოვრებლები, რომლებიც მეხანძრეებს ცეცხლის ჩაქრობაში ეხმარებიან.

ხანძრის გაჩენის სავარაუდო მიზეზად მაღალი ტემპერატურა და მოსახლეობის დაუდევრობა სახელდება.

შეგახსენებთ, რომ ბორჯომში, სოფელ დაბის იმ ტერიტორიაზე, სადაც 2008 წლის აგვისტოს ომის დროს ტყის მასივი დაიწვა, ცეცხლი დღეს, 20 აგვისტოს გაჩნდა. აღნიშნულ ტერიტორიაზე ბოლო წლების განმავლობაში დამწვარი ტყის მასივის აღდგენითი სამუშაოებიც მიმდინარეობს.

შსს–ს ინფორმაციით, ხანძრის გაჩენის მიზეზებზე ძიება, სსკ–ს 187–ე მუხლით დაიწყო, რაც ნივთის დაზიანება ან განადგურებას გულისხმობს.







[sknews.ge]