დაბაში ხანძრის ჩაქრობის პროცესში კიდევ 200 მეხანძრე ჩაერთო

სახანძრო ტექნიკისა და 200 მეხანძრის მობილიზება, ხანძრის ჩასაქრობად თბილისიდან, შიდა ქართლიდან და მიმდებარე რეგიონებიდან მოხდა.

როგორც, საგანგებო სიტუაციების მართვის სამსახურში განმარტავენ, სოფელ დაბის ტყეში ხანძრის ძირითადი კერები ჯერ კიდევ არ ჩამქრალა, მთელი ღამის განმავლობაში კი მის ლიკვიდაცია, რეგიონის 100–მდე მეხანძრე ცდილობდა.

წუხელივე გაიჭრა ხანძრის კერებთან მისადგომი გზები და ამ დრისთვის, უკვე სახანძრო ტექნიკა ტერიტორიაზე შეყვანილია.დილიდან, მუშაობა განაახლა სასაზღვრო პოლიციის ვერტმფრენმა, რომელმაც ღამით, ცუდი ხილვადობის გამო მუშაობა შეწყვიტა.

საგანგებო სიტუაციების მართვის სამსახურში განმარტავენ, რომ დასახლებულ პუნქტებზე ცეცხლის გადასვლის საშიშროება არ არსებობს.

შეგახსენებთ, რომ ბორჯომში, სოფელ დაბის იმ ტერიტორიაზე, სადაც 2008 წლის აგვისტოს ომის დროს ტყის მასივი დაიწვა, ცეცხლი გუშინ, 20 აგვისტოს გაჩნდა. აღნიშნულ ტერიტორიაზე ბოლო წლების განმავლობაში დამწვარი ტყის მასივის აღდგენითი სამუშაოებიც მიმდინარეობს.

ხანძრის გაჩენის სავარაუდო მიზეზად მაღალი ტემპერატურა და მოსახლეობის დაუდევრობა სახელდება.

შსს–ს ინფორმაციით, ხანძრის გაჩენის მიზეზებზე ძიება, სსკ–ს 187–ე მუხლით დაიწყო, რაც ნივთის დაზიანება ან განადგურებას გულისხმობს.

[sknews.ge]