დაბაში ხანძრის ლოკალიზებაში შს მინისტრი ჩაერთო

შინაგან საქმეთა სამინისტროს საზოგადოებასთან ურთიერთობის სამსახურის ინფორმაციით, ბორჯომში ხანძრის ჩაქრობის პროცესში შინაგან საქმეთა მინისტრი გიორგი მღებრიშვილი ჩაერთო, რომელიც ცეცხლის ლოკალიზების პროცესს უშუალოდ უხელმძღვანელებს.

სოფელ დაბის ტერიტრიაზ, გაჩენილი ხანძრის კერების ლოკალიზება უკვე მეორე დღეა უშედეგოდ მიმდინარეობს. ტყის მასივის 5 ჰექტარზე გავრცელებული ცეცხლის ჩაქრობას, ამ დროისათვის 300–ზე მეტი მეხანძრე და მძიმე ტექნიკა ცდილობს.

სახანძრო ტექნიკამ ხანძრის კერებამდე მისვლა, მხოლოდ დღეს, 21 აგვისტოს დილით მოახერხა, მას შემდეგ, რაც მიუდგომელი გზა გაიჭრა.

მეხანძრეებთან ერთად, ცეცხლის ჩაქრობის პროცესში ჩართულნი არიან მოხალისებიც.

ეროვნული სატყეო სააგენტოს უფროსის თორნიკე გვაზავას განმარტებით, ცეცხლის ლოკალიზება დღის მეორე ნახევარში, ხოლო ლიკვიდაცია საღამომდე უნდა მოხერხდეს.

"საბედნიეროდ, ლოკალიზაციისკენ მიდის ხანძარი. მთელი ღამის განმავლობაში მუშაობდა მძიმე ტექნიკა, მეორე მხრიდან გზა გაკეთდა, საიდანაც უკვე დაიწყო მოძრაობა სახანძრო მანქანებმა. ადგილზე არიან მაშველები, სატყეო სამსახური. ვერტმფრენი აწარმოებს სამაშველო სამუშაოებს და ვფიქრობ, რომ დღის მეორე ნახევრისთვის ლოკალიზებული იქნება ხანძარი, ლიკვიდირებული კი საღამოს,“–აცხადებს გვაზავა.

შეგახსენებთ, რომ ბორჯომში სოფელ დაბას მიმდებარე ტერიტორიაზე ხანძარი გუშინ, 20 აგვისტოს გაჩნდა.ხანძრის გაჩენის სავარაუდო მიზეზად მაღალი ტემპერატურა და მოსახლეობის დაუდევრობა სახელდება.

შსს–ს ინფორმაციით, ხანძრის გაჩენის მიზეზებზე ძიება, სსკ–ს 187–ე მუხლით დაიწყო, რაც ნივთის დაზიანება ან განადგურებას გულისხმობს.






[sknews.ge]