ავარია აწყურში – მაშველები მდინარეში გადავარდნილ მამაკაცს ეძებენ

შემთხვევა სოფელ აწყურთან დღეს, 15 მაისს, საღამოს მოხდა.

აწყურში გამგებლის წარმომადგენლის ინფორმაციით, „ნივის“ მარკის ავტომობილი, გზიდან გადავიდა და მდინარის ნაპირას გადავარდა. მანქანა წყალში გადავარდნისგან ხეებმა იხსნა. მანქანაში ორი მგზავრი, სოფელ ზიკილიაში მცხოვრები ცოლ–ქმარი იჯდა. ქალი მსუბუქად დაშავდა, ქმარი კი წყალში ჩავარდა, მდინარემ გაიტაცა და მას სამაშველო სამსახურის ორი ჯგუფი ეძებს.

„ქალი თავისი ფეხით მივიდა სასწრაფო დახმარების სამსახურის მანქანასთან. უკვე ველაპარაკე, მსუბუქი დაზიანებები აქვს. საავადმყოფოში პირველადი დახმარება გაუწიეს“, – ამბობს ახალციხის მუნიციპალიტეტის გამგებლის წარმომადგენელი აწყურის თემში ელგუჯა ჯვარიძე.

მისივე ინფორმაციით, ახალციხისა და ბორჯომის სამაშველო სამსახურის ჯგუფები მამაკაცს ორი ნავით ეძებენ. მაშველები ფიქრობენ, რომ მას ჩითახევის ტერიტორიაზე ნახავენ, სადაც წყალი გუბდება.

ავარიისას დაშავებული ცოლ–ქმარი ზიკილიის მცხოვრებლები არიან. ისინი ბორჯომიდან ბრუნდებოდნენ. როგორც ქალი ამბობს, ბორჯომში ყველის გასაყიდად იყვნენ და სახლში ბრუნდებოდნენ. მისი ვერსიით, მანქანას საბურავმა უმტყუნა და ნაწვიმზე მოცურდნენ.

ადგილზე ამ დრომდე მობილიზებულია საპატრულო პოლიცია და სამაშველო სამსახური. საქართველოს შინაგან საქმეთა სამინისტროს ინფორმაციით, მომხდარზე ძიება 276-ე მუხლის 1-ლი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს იმ პირის მიერ, ვინც ამ სატრანსპორტო საშუალებას მართავს, რამაც გამოიწვია ჯანმრთელობის ნაკლებად მძიმე დაზიანება.

[ლუბა გიორგაძე, ნინო ნარიმანიშვილი, ახალციხე]