ასპინძაში 12 წლის მოზარდი მდინარეში დაიხრჩო

მომხდარის შესახებ "სამხრეთის კარიბჭეს" ერთ–ერთმა ადგილობრივმა აცნობა. მისი თქმით, გვამის ძებნის სამუშაოები გვიანდება, რაც ადგილობრივების გაღიზიანებას იწვევს.

როგორც "სამხრეთის კარიბჭემ" გაარკვია, შემთხვევა სოფელში დღეს, 7 აგვისტოს, შუადღეს მოხდა. სოფელში გამგებლის წარმომადგენლის გელა გურგენიძის განმარტებით, 13 წლის მოზარდი, სავარაუდოდ, მდინარეზე თევზაობდა. მისივე თქმით, ადგილზეა სამაშველო სამსახურიც, პოლიციაც და სამუშაოები არ დაგვიანებულა: "უბრალოდ ღრმა წყალია და ელოდებიან მყვინთავს, რომ ჩავიდეს მოსაძებნად".

საქართველოს შინაგან საქმეთა სამინისტროს საგანგებო სიტუაციების მართვის სააგენტოში ამბობენ, რომ მაშველების ორი ჯგუფი შემთხვევის ადგილზე შეტყობინების მიღებისთანავე გავიდა, თუმცა, სამძებრო სამუშაოებში მყვინთავების ჩართვაა საჭირო. მათივე ინფორმაციით, სავარაუდოდ მოზარდი ღრმულშია ჩავარდნილი, რომლის სიღრმე 5 მეტრამდეა, ამიტომ, თბილისიდან მყვინთავების ჯგუფის გამოძახება გახდა საჭირო.

"მყვინთავების ჯგუფი უკვე გასულია თბილისიდან, მალე ჩავლენ და როგორც კი ჩავლენ, მიუხედავად იმისა, რომ ღამეა, მაშინვე დაიწყება სამძებრო სამუშაოები. ჯგუფი მთელი ღამის განმავლობაში იმუშავებს", – აცხადებენ უწყებაში.

საზოგადოებასთან ურთიერთობის სამსახურში ამბობენ, რომ ადგილზე იმყოფება რეგიონული სამაშველო სამსახურის უფროსიც.

გამგებლის წარმომადგენლის თქმით, გარდაცვლილის ოჯახი წარმოშობით ნიჯგორიდანაა, თუმცა თბილისში ცხოვრობენ და სოფელში ზაფხულში, დასასვენებლად არიან ჩამოსული.

ნიჯგორში უკვე გაემგზავრა "სამხრეთის კარიბჭეს" ჟურნალისტი. თვალი ადევნეთ ვებს, დაზუსტებულ ინფორმაციას და დეტალებს მოგაწვდით.

[ნინო ნარიმანშვილი, ასპინძა]