ასპინძაში დამხრჩვალი მოზარდის მოსაძებნად მყვინთავებს ელოდებიან

როგორც გარდაცვლილის ბიძა გვიყვება, შემთხვევა დღეს, დაახლოებით საღამოს ხუთ საათზე მოხდა. მოზარდი სამ მეგობართან მდინარის პირას თამაშობდა, მოულოდნელად, წყლის დიდი ნაკადი მოვარდა და ბავშვი გაიტაცა.

მისივე თქმით, თავად შემთხვევის ადგილზე მომხდარის შემდეგ მივიდა. მომხდარიდან მალევე გამოიძახეს სამაშველო სამსახური, ჯგუფები მალევე მივიდნენ, თუმცა, იმის გამო, რომ წყალი ამ ადგილას ღრმაა, მათ კი საჭირო აღჭურვილობა არ ჰქონდათ, ძებნა ვერ დაიწყეს.

გარდაცვლილის ბიძა ამბობს, რომ მათ უყურადღებოდ მოექცნენ: "რა არის ასეთი, რომ ორსაათ–ნახევრის გზაა და ხუთ საათზე მეტი გავიდა და მყვინთავები ვერ ჩამოვიდნენ თბილისიდან".

მყვინთავების დაგვიანების გამო ადგილობრივების ნაწილმა სოფელში გზა გადაკეტა.

"ასე ყურადღების მიქცევა გვინდოდა, რომ თვითმფრინავით გამოეგზავნათ მყვინთავები", – გვეუბნება ადგილობრივი ფრიდონ ასპანიძე.

გადაკეტილი გზა პოლიციის თანამშრომლებმა მალევე გახსნეს. ამ დროისათვის მოძრაობა შეფერხებული არ არის.

შემთხვევის ადგილზე მყოფი მაშველები ოფიციალურ საუბარს ერიდებიან, თუმცა, ამბობენ, რომ დაზარალებულები უყურადღებოდ არავის დაუტოვებია: "ჩავყვინთეთ, 4–დან 6 მეტრამდე სიმაღლეზე ჩავედით, მაგრამ უფრო ღრმაა და მეტზე ჩასვლა არ შეგვეძლო".

ადგილობრივების თქმით, ამ ადგილას მდინარის სიღრმე 12 მეტრამდე უნდა აღწევდეს.

შეგახსენებთ, უბედური შემთხვევა სოფელ ნიჯგორში დღეს, 7 აგვისტოს მოხდა. გარდაცვლილი 12 წლის მოზარდია (თავდაპირველ ინფორმაციაში გვითხრეს, რომ იგი 13 წლის იყო). მოზარდის მშობლები თბილისში, ცალ–ცალკე ცხოვრობენ, ბავშვი ამჯერად მამას ჰყავდა სოფელში, ბებიასთან დასასვენებლად ჩამოყვანილი.

[ნინო ნარიმანიშვილი, თამუნა უჩიძე, ასპინძა]