ასპინძაში მყვინთავებმა დამხრჩვალი მოზარდი იპოვეს

ნიჯგორში მყვინთავებს გარდაცვლილის ოჯახის წევრები და ახლობლები მტკვრის პირთან, იქ სადაც მოზარდი დაიხრჩო, მთელი ღამის განმავლობაში ელოდნენ. თუმცა, მყვინთავები ადგილზე მომუშავე მაშველებს მხოლოდ ამ დილით შეუერთდნენ.

"მოვიდნენ და ბავშვი მალევე იპოვეს", – ამბობს გარდაცვლილის ბიძა.

შეგახსენებთ, ასპინძაში, სოფელ ნიჯგორში, გუშინ, 7 აგვისტოს, მდინარე მტკვარში 12 წლის ბიჭი დაიხრჩო. ბავშვი წარმოშობით ნიჯგორიდანაა, თუმცა თბილისში ცხოვრობდა. იგი სოფელში, ბებიასთან დასასვენებლად იყო ჩამოსული.

გარდაცვლილს მაშველები მთელი ღამის განმავლობაში ეძებდნენ თუმცა, წყლის სიღრმის გამო, მყვინთავების ჩართვა გახდა საჭირო. სამაშველო სამსახურში აცხადებდნენ, რომ მყვინთავები თბილისიდან ასპინძაში შემთხვევიდან მალევე გავიდნენ, თუმცა ისინი ადგილზე მხოლოდ გამთენიისას გამოჩდნენ. მანამდე კი მაშველების ორი ჯგუფი ჯოხებითა და სოფელში, იმ საღამოსვე დამზადებული რკინის კავებით ეძებდნენ.

[თამუნა უჩიძე, ახალციხე]