დღეს დილიდან ათობით ადამიანმა, ადგილობრივი ხელისუფლების წარმომადგენლებთან თავიანთი
საცხოვრებელი პირობების შესახებ გააპროტესტა და ადგილობრივ ხელისუფლებას დახმარება სთხოვა.
- ”არ გვაქვს ელემენტარული პირობები. ბინები არის ძალიან ავარიული. დაზიანებული სახურავების გამო, თავზე გვაწვიმს. წვიმის დროს თასებით დავრბივართ. არ გვაქვს საშუალება ჩვენი სახსრებით რომ შევაკეთოთ, ამიტომ ვითხოვთ დახმარებას. ჩვენს გარდა, კიდევ 11 ბინაა ამ დღეში. ადამიანებად არავინ მიგვიჩნევს, ჰაერში ვართ გამოკიდებულები”,-ამბობს ზარზმელის ქუჩის მცხოვრები სვეტლანა ოთანაძე.
ზარზმელის ქუჩის, ე.წ ”აძინაცატების” დასახლებას დაზიანებული სახურავების გარდა, გზის პრობლემაც აწუხებს. მოასფალტებული გზა, მხოლოდ დასახლების პირველ კორპუსამდე მიდის. აქ მცხოვრებლებმა ადგილობრივ თვითმმართველობას რამდენიმე ხნის წინ წერილობითაც მიმართა.
- ”ძალიან ცუდი გზები გვაქვს.მანქანას კი არა, ფეხით მოსიარულეს უჭირს გადაადგილება. სასწრაფო დახმარებას როცა ვიძახებთ თავს იკავებენ ცუდი გზის გამო აქ ამოსვლაზე”, - აცხადებს ოთანაძე.
მოსახლეობა შეხვედრას მუნიციპალიტეტის გამგებლის მოვალეობის შემსრულებელთან ბესიკ ბლიაძესთან ითხოვდა. იმის გამო, რომ ბლიაძე ამ დროს სოფლის რწმუნებულთან თათბირს ატარებდა, შემდეგ კი ბრიტანეთის ელჩისთვის უნდა ემასპინძლა, მოსახლეობას გამგებლის მოადგილე თამარ გოგოლაძე და გამგებლის მრჩეველი იურიდიულ საკითხებში გოჩა პარუნაშვილი შეხვდა.
პარუნაშვილი განმარტავს რომ ზარზმელის ქუჩაზე გზის საფარის მოწესრიგება სომხურ კომპანია ”შინაშხარს” ევალება. კომპანია ამ ქუჩაზე წყლის სარეაბილიტაციო სამუშაოებს რამდენიმე თვეა ახორციელებს.
- ”ჩვენ დავუკავშირდით კომპანიის ხელმძღვანელობას და გვითხრეს, რომ ხელშეკრულებაში არსებულ პირობებს შეასრულებენ პირნათლად, ანუ გზას პირვანდელ მდგომარეობას დაუბრუნებენ, ამდენად ეს პრობლემად არ მიგვაჩნია. უბრალოდ ხელისშემშლელი პირობები არის ამინდი. ჩვენ ვთხოვთ ხელმძღვანელობას , რომ ერთჯერადად, სადაც ტალახია გზა გაიწმინდოს”-ამბობს გოჩა პარუნაშვილი და ამატებს რომ, რაც შეეხება გზის საფარის კაპიტალურად შეკეთებას უახლოეს მომავალში დაიწყება.
რაც შეეხება სახურავების თემას, მისი თქმით, ეს სამხარეო ადმინისტრაციის პრეროგატივაა.
ზარზმელის ქუჩაზე მცხოვრებლებმა ვითარების გარკვევა სამხარეო ადმინისტრაციაშიც სცადეს. მოსახლეობას მხარის რწმუნებულის მოადგილე გელა დემეტრაძე შეხვდა. მოსახლეობას აინტერესებდა თუ გაგრძელდებოდა პროექტი, რომელიც ახალციხის მუნიციპალიტეტში პრეზიდენტის ფონდიდან გამოყოფილი თანხით სტიქიის შედეგად დაზიანებული სახურავების შეკეთებას გულისხმობდა.
- ”ვუპასუხე, რომ თანხა რაც გაგვაჩნდა ეკონომიის სახით დარჩენილი, ფინანსთა სამინისტრომ წაიღო. გუბერნია ისეც არ ახორციელებდა მსგავს პროექტებს, ეს იყო ერთადერთი შემთხვევა, რომელიც სტიქიის გამო”,-განმარტავს დემეტრაძე და ამატებს, რომ გასულ წელს ქალაქში 150-მდე მრავალბინიანი სახლი გადაიხურა, თუმცა ზარზმელის ქუჩზე ბინების გადახურვა ვეღარ მოესწრო.
როდის დაკმაყოფილდება ზარზმელის ქუჩის მცხოვრებთა მოთხოვნები ჯერჯერობით უცნობია, მოსახლეობა კი აცხადებს, რომ ადგილობრივი ხელისუფლებისგან დაპირება მიიღო.
-”გაითვალისწინებენ თუ არა ბიუჯეტში თანხას ჩვენი პრობელმების მოსაგვარებლად არ ვიცით. ამ ეტაპზე ვითხოვთ ელემენტარულს, რომ გზაზე გასავლელი იყოს. შეგვპირდნენ, ტრაქტორს გამოგიგზავნით და გზას გაწმენდენო”, - ამბობს ზარზმელის ქუჩის მცხოვრები ზაზა ჩაჩანიძე.
[თინათინ ზაზაძე, ახალციხე]