„სახლში ქოლგებით დავდივართ“ – ზარზმელის ქუჩის მცხოვრებლები დახმარებას ითხოვენ [Photo]

ზარზმელის ოთხ ნომერში მცხოვრებლები ამბობენ, რომ ორ სართულიანი ბინების სადარბაზოებში ჭერი იმდენად დაზიანებულია, რომ ბათქაში ცვივა.

„დალპა მთელი შენობა, ზემოდან ცვივა ყველაფერი, ფრთხილად უნდა იარო, რომ თავში არაფერი დაგეცეს! ან თავზე „კასკა“ უნდა გეხუროს, სახლის კარებამდე რომ უსაფრთხოდ მიხვიდე“, – ამბობს ანაიდა სამხარიანი.

მისი თქმით, იმის გამო რომ კორპუსი ავარიულია, რამდენიმე ოჯახი საცხოვრებლად სხვაგან გადავიდა: „მე რომ წასასვლელი არსად მაქვს, აქ უნდა მოვკვდე?!“



დაზიანებული სახურავიდან წვიმის დროს „სამხედრო ბინებში“ წყალი ჩამოდის. ასეთ დროს სადარბაზოებთან ერთად ოთახებიც სველდება.

„ახლა გავაკეთე რემონტი მაგრამ რა აზრი ჰქონდა წვიმამ მალევე გამიფუჭა, ტაშტით დავბივარ ყველა წვიმის დროს, თან ერთ ხელშიც ქოლგა მიჭირავს, რომ არ დავსველდე“, – აცხადებს ბელა ტაბატაძე.

ზარზმელის ოთხ ნომერში მცხოვრებლების კიდევ ერთი პრობლემა ეზოში კორპუსთან ახლოს მდგომი აკაციის ხეა. მისი ტოტები სახლის სახურავზეა გადაფენილი და როგორც ადგილობრივები ამბობენ, ქარიან ამინდში დაზიანებულ სახურავს კიდევ უფრო აზიანებს. გარდა ამისა ხეს გამხმარი ტოტები სცვივა და შესაძლოა ბავშვებს დაეცეთ.



„ეზოში სულ ბავშვები ტრიალებენ, ეს ტოტი რომ მოტყდეს და ჩამოვარდეს ვინ არის პასუხის მგებელი?!“ – კითხულობს ტაბატაძე.

ზარზმელის ქუჩის მცხოვრებლების თქმით, როგორც ხის მოჭრის, ისე შენობის შეკეთების მოთხოვნით ადგილობრივ ხელისუფლებას არაერთხელ მიმართეს. ორი თვის წინ 150 ადგილობრივის ხელ მოწერით, მათ მერიაში განცხადებაც შეიტანეს, თუმცა უშედეგოდ.

„ჩვენს ხელისუფლებას მარტო არჩევნებზე ვახსენდებით, ისიც მოვლენ გაიკვირვებენ აქ სად ცხოვრობთო და მიდიან“, – ამბობენ ადგილობრივები.

ახალციხის მერიაში „სამხრეთის კარიბჭეს“ განუმარტეს, რომ ზარზმელის ქუჩაზე ე.წ. სამხედრო ბინები თავდაცვის სამინისტროს ბალანსზეა და ვიდრე ქალაქის დაქვემდებარებაში არ გადავა, ადგილობრივებს დახმარებას ვერ გაუწევენ.



ქალაქის მერის ვლადიმერ ზედგინიძის განმარტებით, ტერიტორიის ქალაქისათვის გადაცემის მოთხოვნით, უწყებას არაერთხელ მიმართა, თუმცა უარი მიიღო.

თავდაცვის სამინისტროში კი განმარტავენ, რომ ამ დრომდე ტერიტორიის გადაცემის მოთხოვნით ახალციხის მერიიდან წერილი არ შესულა: „ჩვენ ამ ფართობზე არაფრის გაკეთებას არ ვგეგმავთ. იმ შემთხვევაში თუ ქალაქის მერია, ქონების მართვის სააგენტოს ოფიციალურად მიმართავს, თავდაცვის სამინისტრო ამ ტერიტორიის ქალაქის გადაცემის თაობაზე აუცილებლად იმსჯელებს“, – გვითხრეს თავდაცვის სამინისტროს საზოგადოებასთან ურთიერთობის სამსახურში.

ახალციხეში, ზარზმელის ქუჩაზე ორსართულიანი ბინები, 1950–იან წლებში, მეორე მსოფლიო ომის დასრულების შემდეგ აშენდა, რომელიც სამხედროებისათვის იყო განკუთვნილი. ახლა ამ ბინებში დაახლოებით 150–მდე ოჯახი ცხოვრობს.











[ლუბა გიორგაძე, ახალციხე]