პირველი სკოლის მშენებელთან კონტრაქტს წყვეტენ

"ინტერ პლიუსი" ახალციხის პირველ საჯარო სკოლას მიმდინარე კვირის ბოლომდე დატოვებს. შენობა დაილუქება და აქ სარემონტო სამუშაოებს სხვა კომპანია დაასრულებს. ამის შესახებ გადაწყვეტილება დამკვეთმა, "ათასწლეულის გამოწვევის ფონდმა" გასულ კვირას, სკოლაში სარემონტო სამუშაოების დათვალიერების შემდეგ მიიღო.

"ყველანაირი მდგომარეობა გავითვალისწინეთ, არ გვინდოდა ვინმეს ეფიქრა, რომ ჩვენ ქართულ ბიზნესს ხელს ვუშლით ან რაიმე მსგავსი, თუმცა კონტრაქტისა და ჩვენი რეგულაციებით გათვალისწინებული ყველა ვადა ამოიწურა, რეალურად სხვა გზა აღარ არის. ამიტომ "ინტერ პლიუსთან" მიმდინარე კვირის ბოლომდე კონტრაქტი შეწყდება", – აცხადებენ "ათასწლეულის გამოწვევის ფონდის" საზოგადოებასთან ურთიერთობის სამსახურში.

მათი განცხადებით, სკოლაში დარჩენილი სარემონტო სამუშაოების დასასრულებად ტენდერი ხელახლა გამოცხადდება, თუმცა იმის გათვალისწინებით, რომ სკოლაში სასწავლო პროცესი სექტემბერში უნდა განახლდეს, სატენდერო პროცედურები დაჩქარებულ ვადებში განხორციელდება.

"ხელშეკრულებას გავაფორმებთ ისეთ კომპანიასთან, რომელიც ჩვენი კონტრაქტორია და სარეაბილიტაციო სამუშაოებს აღმოსავლეთ საქართველოში ახორციელებს. ანუ ეს ისეთი კომპანია იქნება, რომელსაც ვენდობით და რომლის მიერ შერსულებული სამუშაოც წარმატებით ჩაგვბარდა. ასე დროს მოვიგებთ", – აცხადებენ "ათასწლეულის გამოწვევის ფონდში".

სკოლაში მცირე სარემონტო სამუშაოებია დარჩენილი. როგორც დამკვეთი გვიხსნის, აქ კიბეების უჯრებია მოსაწყობი და "ინტერ პლიუსის" მიერ ხარვეზებით შესრულებული სამუშაოებია გამოსასწორებელი: "კეთილსინდისიერი შემსრულებლის მუშაობის შემთხვევაში, ყველა სამუშაო სამ კვირაში დასრულდება, ალბათ".

რაც შეეხება "ინტერ პლიუსს", დამკვეთ კომპანიაში აცხადებენ, რომ მის წინააღმდეგ საჯარიმო სანქციები უკვე ამოქმედებულია.

[sknews.ge]