მაისში დამწვარი მამა–შვილი ამ დრომდე არ დაუკრძალავთ

82 წლის მამისა და მისი 58 წლის ქალიშვილის გვამები, დაახლოებით, ორი თვეა რაც ლევან სამხარაულის სახელობის სასამართლო ექსპერტიზის ეროვნულ ბიუროშია. გარდაცვლილებს ახლობლები არ ჰყავთ, ამიტომ მათი დაკრძალვის ხარჯებს ახალციხის მუნიციპალიტეტის გამგეობა გაიღებს.

შეკითხვაზე, თუ რატომ არ დაიკრძალა გვამები აქამდე, გამგეობაში გვაპსუხობენ, რომ ექსპერტიზა არ დასრულებულა, შესაბამისად მათ საექსპერტო ბიუროდან დოკუმენტიც არ მიუღიათ, რის საფუძველზეც ბიუჯეტიდან თანხა გამოიყოფა და გვამები დაიკრძალება.
სამხარაულის ექსპერტიზის ბიუროში კი ამბობენ, რომ ექპსერტიზა ამ დრომდე ტარდება .

„დანიშნულია არა მხოლოდ სხეულის, არამედ დეენემის ექსპერტიზაც. მისი დასრულების თანავე შეტყობინებას მიიღებს საგამოძიებო სამსახური და ამის მერე დაკრძალვა შესაძლებელი იქნება“, – გვითხრა სამხარაულის ექსპერტიზის ბიუროს საზოგადოებასთან ურთიერთობის სამმართველოს უფროსმა ეკა ჭუმბურიძემ.

იურისტების განმარტებით, როგორც წესი საექსპერტო ბიუროში გვამები ამდენი ხნით არ რჩება. მათი განმარტებით, იმის მიხედვით თუ რაზე ინიშნება ექსპერტიზა გულიდან, კუნთიდან და სხვა ორგანოებიდან ნიმუშებს იღებენ, ლუქავენ და შემდეგ კვევას ამ მასალაზე ატარებენ.

როგორც წესი, გვამიდან აღებულ ნაწილებზე რომ ტარდება ექსპერტიზა და არა უშუალოდ გვამზე, ამას სამხარაულის ბიუროშიც აცხადებენ, თუმცა მათი თქმით, ამდენად სირთულე დეენემის ექსპერტიზამ შექმნა: „რადგან მათ პატრონი არ ჰყავთ და დეენემებია დანიშნული ექსპერტიზა ძვლებზეც უნდა ჩატარდეთ“.

სოფელში კი რომელშიც ავეტისიანები ცხოვრობდნენ, ფიქრობენ რომ მათი ექსპერტიზის საკითხი დროში იმის გამო გაიწელა, რომ გარდაცვლილებს ახლობლები არ ჰყავთ: „უპატრონოები არიან და არ აინტერესებთ როდის დაიკრძალებიან. რამდენი მკვდირსთივს ჩაუტარებიათ ექსპერტიზა, მაგრამ თვეობით იქ არავინ ჰყოლიათ“, – ამბობს სოფელ წყალთბილაში მცხოვები სანველ პეტროსიანი.

გარდაცვლილების დასაკრძალად ახალციხის გამგეობა მაქსიმუმ 1 000 ლარს გამოყოფს. „მემკვიდრის გარეშე დარჩენილი მარტოხელა მოქალაქეების სარიტუალო მომსახურებისთვის“ მაქსიმუმ 500 ლარი გამოიყოფა.

„მას შემდეგ რაც სამხარაულის ბიუროდან პასუხს მივიღებთ, შესაბამისი კომისია იმჯელებს და თანხის ოდენობას განსაზღვრავს“, – აცხადებენ გამგეობაში.

შეგახსენებთ, რომ სოფელ წყალთბილაში ავეტისიანების სახლში ხანძარი 29 მაისს გვიან ღამით გაჩნდა. შემთხვევის შედეგად 82 წლის მამა და მის 58 წლის ქალიშვილი დაიწვნენ.

მომხდარს საქართველოს შინაგან საქმეთა სამინისტრო სისხლის სამართლის კოდექსის 187–ე მუხლით იძიებს, რაც სხვისი ნივთის დაზიანებას ან განადგურებას გულისხმობს.

[თამუნა უჩიძე, ახალციხე]