წყალთბილაში დამწვარი მამა–შვილის დაკრძალვის ხარჯს გამგეობა დაფარავს

გამგეობა სარიტუალო ხარჯებისთვის თანხას მას შემდეგ გამოყოფს, რაც გარდაცვლილების ექსპერტიზა დასრულდება და ყველა შესაბამისი დოკუმენტი თვითმმართველობას გადაეგზავნება.

„ამ დროისთვის მათ ექსპერტიზა სამხარაულის საექსპერტო ბიუროში უტარდებათ. როგორც აგივხსნეს, ამას 15 დღე სჭირდება. ამიტომ ვიდრე ეს პროცედურები არ დასრულდება და ექსპერტიზის დასკვნა გარდაცვალების მოწმობებთან ერთად ჩვენთან არ გამოიგზავნება, თანხის გამოყოფაზე ვერ ვიმსჯელებთ“, – აცხადებენ ახალციხის მუნიციპალიტეტის გამგეობაში.

მათი განცხადებით, თანხა მხოლოდ სარიტუალო ხარჯებისთვის გამოიყოფა, რაც სასახლის ყიდვასა და ტრანსპორტირებას გულისხმობს: „აქ, ბუნებრივია, ქელეხის ხარჯი არ იგულისხმება. თითო გარდაცვლილზე მაქსიმუმი თანხა გათვალისწინებული 500 ლარია. საბოლოოდ რა ოდენობას თანხა გამოიყოფა ორივესთვის, ამაზე კომისია იმსჯელებს და შემდეგ სოციალური გაცემის წესში შესაბამისი მუხლიდან გავწერთ“.

შეგახსენებთ, რომ სოფელ წყალთბილაში ავეტისიანების სახლში ხანძარი 29 მაისს გვიან ღამით გაჩნდა. შემთხვევის შედეგად 82 წლის მამა და მის 58 წლის ქალიშვილი დაიწვნენ.

მომხდარს საქართველოს შინაგან საქმეთა სამინისტრო სისხლის სამართლის კოდექსის 187–ე მუხლით იძიებს, რაც სხვისი ნივთის დაზიანებას ან განადგურებას გულისხმობს.

[თამუნა უჩიძე, ახალციხე]