ხანძრის შედეგად დამწვარი მამა–შვილი – რა მოხდა წყალთბილაში [Photos]

სოფელ წყალთბილაში, ავეტისიანების სახლს ისევ კვამლი ასდის. აქედან დამწვარი მამა–შვილი დღეს, 29 მაისს, დილით მაშველებმა გამოიყვანეს. ამჟამად 82 წლის მამისა და მის 58 წლის ქალიშვილის გვამებს ექსპერტიზა უტარდება.

ხანძარი ავეტისიანების ორსართულიან სახლში გვიან ღამით გაჩჩნდა. დაახლოებით 00:30 საათზე ალმოდებულ სახლში გაზის ბალონი აფეთქდა და ხმაურზე კარის მეზობლად მცოხვრები სარქის ალბერტიანი გარეთ გამოვიდა.



„მთელ სახლში, შიგნით, ფანჯრებში, კარებში, ცეცხლი იყო. გზაზე მეზობლის მანქანა დავინახე, მოდიოდა და გავაჩერე, ვთხოვე სახანძროში დაერეკა“, – გვიყვება სარქის ალბერტიანი.

მისი თქმით, თანასოფლელმა წყალთბილაში ახალციხის გამგებლის წარმომადგენელთან პეტროს ვართანიანთან დარეკა და დახმარება სთხოვა, თავად კი ეკლესიის ზარება დარეკა, რომ სოფელი გაეღვიძებინა.

„ყველა მოვარდა. გარშემო ბალონებში წყალი მქონდა და ვასხით. ყველა მეზობელს რაც შეეძლო წყალი მოჰქონდა“, – ამბობს სარქის ალბერტიანი.



ორსართულიან სახლში მოწყობილი მხოლოდ ერთი ოთახი იყო. მამა–შვილი ამ ოთახში ცხოვროობდა. აქვე ედგათ ღუმელი და ორი რკინის საწოლი.

„ალბათ ღუმელი ენთოთ და ხანძარი იქიდან გაჩნდა, იმიტომ, რომ ცეცხლი შიგნით იყო მოდებული და გარეთ მერე გადმოვიდა“, – აცხადებს წყალთბილში მცხოვრები ონიკ ადამიანი.

მისი თქმით, მაშველებმა ცეცხლმოდებულ სახლში შესვლა გამთენიისას შეძლეს: „ერთი ძალიან დამწვარი იყო უკვე, მეორე შედარებით ნაკლებად“.



ადგილობრივების თქმით, ავეტისიანებს სახლში სამი გაზის ბალონი ჰქონდათ. სამივე ნაწილ–ნაწილ აფეთქდა.

„გამოფრინდა გაზის ბალონი. საშინელი ხმა ჰქონდა აფეთქებას“, – გვიყვება ავეტისიანების მეზობლად მცხოვრები ჟენია მოსოიანი.

გარდა გაზის ბალონისა აფეთქების შედეგად სახლიდან სხვა საოჯახო ნივთებიც ცვიოდა. ასი მეტრის მოშორებით დაჭეჭყილი ქვაბი ახლაც გდია.

„10 საათი აქრობდა ცეცხლს 5 სახანძრო მანქანა. ადიგენის ბრიგადაც კი დაიხმარეს. მაგრამ შიგნით დარჩენილების გადარჩენა სამწუხაროდ ვერ შეძლეს“, – ამბობს წყალთბილაში გამგებლის წარმომადგენელი პეტროს ვართანიანი.

მისი თქმით, ოჯახს ნათესავები და ახლობლები არ ჰყავს, ავეტისიანები სოცილაურად დაუცველები იყვნენ და შემწეობას იღებდნენ. მათი გასვენება სოფელს მოუწევს: „დარწმუნებული ვარ რომ სოფელი გაასვენებს, მაგრამ ბუნებრივია ამისთვის გამგეობა ფულს გამოყოფს. რამდენს ჯერ წინასწარ ზუსტად ნამდვილად არ ვიცი“.

საქართველოს შინაგან საქმეთა სამინისტროს ინფორმაციით, მომხდარზე ძიება სისხლის სამართლის კოდექსის 187–ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.











[თამუნა უჩიძე, ახალციხე]