22 წლის ჯარისკაცის გარდაცვალების საქმეზე ექსპერტიზა დასრულდა

რა გახდა 22 წლის ჯარისკაცის სიკვდილის მიზეზი - სამხარაულის სახელობის ექსპერტიზის ეროვნული ბიუროში რვა თვიანი მუშაობის შედეგებზე არ საუბრობენ. მხოლოდ გვიდასტურებენ, რომ დასკვნა მზადაა და ის უკვე საგამოძიებო უწყებაშია.

რა წერია კომპლექსური ექსპერტიზის დასკვნაში, ამას ჯერ არც საქართველოს პროკურატურაში ასაჯაროებენ. საგამოძიებო უწყებაში „სამხრეთის კარიბჭეს“ განუმარტეს, რომ ჩატარებული ექსპერტიზის დასკვნებსა და სხვა საგამოძიებო მოქმედებების შედეგებს შეაჯამებენ და მხოლოდ ამის შემდეგ შეძლებენ მოგვაწოდონ ინფორმაცია.

შემთხვევა 2017 წლის 27 ივნისს, ოსიაურში, ჯარების ლოგისტიკური უზრუნველყოფის სარდლობის ბაზის ტერიტორიაზე მოხდა. პირველი კლასის რიგითის გარდაცვალების ფაქტზე სამხედრო პოლიციამ ძიება თვითმკვლელობამდე მიყვანის მუხლით დაიწყო.

გამოძიების ოფიციალურ ვერსიას თავიდანვე არ ეთანხმებოდა გარდაცვლილი ჯარისკაცის ოჯახი. მამა, გოჩა ინასარიძე „სამხრეთის კარიბჭესთან“ საუბარში თვითმკვლელობას გამორიცხავს. იგი გამოძიების სპეციალურად გაჭიანურებაზე საუბრობს. საგამოძიებო უწყებებში კი ირწმუნებოდნენ, რომ ექსპერტიზის დასკვნებს ელოდებოდნენ.

შესაძლებელია თუ არა ექსპერტიზის დასკვნის საფუძველზე საქმის კვალიფიკაცია შეიცვალოს, საქართველოს პროკურატურაში ჯერ არც ამაზე საუბრობენ.

[ლუბა გიორგაძე, ახალციხე]