მაისში დამწვარ მამა–შვილს წყალთბილაში დღეს გადაასვენებენ

ამის შესახებ, „სამხრეთის კარიბჭეს“ საქართველოს შინაგან საქმეთა სამინისტროში განუცხადეს.

„ცხედრები ოჯახმა ჩაიბარა“, – ამბობენ შსს–ში.

წყალთბილაში დამწვარ მამა–შვილს ნათესავები მათი გარდაცვალებიდან დაახლოებით ორი თვის შემდეგ გამოუჩნდნენ. მისაკ მოსიკიანი, რომელიც იმავე სოფელში ცხოვრობს, სადაც გარდაცვლილები, აცხადებს, რომ გარდაცვლილები მისი დედა და ბაბუა არიან. მოსოკიანი ამბობს, რომ ცხედრებს თავად დაკრძალავს.

ორ თვეზე მეტ ხანს სამხარაულის ექსპერტიზის ბიუროში ცხედრები იმის გამო დააყოვნეს, რომ მათ აქ დეენემზე ექსპერტიზა უტარდებოდათ.

„ჩვენთან გარდაცვლილები როგორც უცნობები ისე იყვნენ შემოყვანილი. გამოძიება გვეკითხებოდა, იყო თუ არა ამ ორ ადამიანს შორის ნათესაური კავშირი“, – გვითხრეს სამხარაულის ექსპერტიზის ბიუროს საზოგადოებასთან ურთიერთობის სამსახურში.

ახალციხის მუნიციპალიტეტის გამგეობაში აცხადებენ, რომ ცხედრებს სოფელში დღეს ჩამოსვენებენ: „თუ ოჯახი არ დაკრძალავს, სარიტულო ხარჯებს ჩვენ გავიღებთ“.

შეგახსენებთ, რომ სოფელ წყალთბილაში ავეტისიანების სახლში ხანძარი 29 მაისს გვიან ღამით გაჩნდა. შემთხვევის შედეგად 82 წლის მამა და მის 58 წლის ქალიშვილი დაიწვნენ.

მომხდარს საქართველოს შინაგან საქმეთა სამინისტრო სისხლის სამართლის კოდექსის 187–ე მუხლით იძიებს, რაც სხვისი ნივთის დაზიანებას ან განადგურებას გულისხმობს.

[თამუნა უჩიძე, ახალციხე]