სოფელ წყალთბილაში დამწვარ მამა–შვილს ნათესავები გამოუჩნდნენ

მისაკ მოსიკიანი იმავე სოფელში ცხოვრობს, სადაც გარდაცვლილები – 29 მაისს მომხდარი ხანძრის შედეგად დამწვარი 82 წლის მამა და მისი 58 წლის ქალიშვილი ცხოვრობდნენ, მისაკი ამბობს, რომ გარდაცვლილები მისი დედა და ბაბუა არიან და თანასოფლელების ინფორმაცია, რომ მათ არავინ ჰყავდათ, სიმართლეს არ შეესაბამება.

„ორი შვილი ვყავართ. დედაჩემი ბაბუაჩემთან იყო, მას უვლიდა და მასთანვე რჩებოდა, ჩვენ სხვადასხვა სახლში ვცხოვრობთ“, – გვიხსნის იგი და ამატებს, რომ დილით, დამწვარი ცხედრები სახლიდან თავად გამოიტანა.

მისაკ მოსიკიანი ამბობს, რომ დედას და ბაბუას თავისი სახსრებით დაკრძალავს: „არც გამგეობის დახმარება გვინდა და არაფერი. ჩვენ მივხედავთ ჩვენს გარდაცვლილებს, უკვე ყველაფერი მოგვარებულია, სამშაბათს დავკრძალავთ“.

კითხვაზე, იცოდა თუ არა, რომ გარდაცვლილებს ახლობლები ჰყავდათ და რის საფუძველზე ირწმუნებოდა, რომ მიცვალებულები უპატრონოდ დარჩნენ, სოფელში გამგებლის წარმომადგენელი პეტროს ვართანიანი ამბობს, რომ მამა–შვილის არავინ აქცევდა ყურადღებას: „ესენი წლების განმავლობაში მარტო იყვნენ“.

ინფორმაცია, რომ გარდაცვლილებს ახლობლები ჰყავთ, უკვე შეიტყვეს ახალციხის მუნიციპალიტეტის გამგეობაში. უწყებაში ამბობენ, რომ იმ შემთხვევაში, თუ შვილები ცხედრების დაკრძალვას თავად უზრუნველყოფენ, მუნიციპალიტეტი თანხას აღარ გამოყოფს. ვინაიდან ცხედრები უპატრონოდ ითვლებოდა, გამგეობიდან სარიტუალო ხარჯებისთვის 1000 ლარი უნდა გამოყოფილიყო.

შეგახსენებთ, რომ ახალციხეში, სოფელ წყალთბილაში, ავეტისიანების სახლში, ხანძარი 29 მაისს, გვიან ღამით გაჩნდა. შემთხვევის შედეგად მამა და მისი ქალიშვილი დაიწვნენ. ხანძრიდან მეორე დღესვე, ცხედრები ლევან სამხარაულის სახელობის სასამართლო ექსპერტიზის ეროვნულ ბიუროში გადაასვენეს. ამ დრომდე ცხედრები იქ რჩება, ბიუროში ამბობენ, რომ ექსპერტიზა არ დასრულებულა.

ამ დრომდე უცნობი რჩება რამ გამოწვია ხანძარი. მომხდარს საქართველოს შინაგან საქმეთა სამინისტრო სისხლის სამართლის კოდექსის 187–ე მუხლით იძიებს, რაც სხვისი ნივთის დაზიანებას ან განადგურებას გულისხმობს.

[ლუბა გიორგაძე, ახალციხე]