ახალციხეში, სოფელ წყალთბილაში, ხანძარს მამა–შვილი ემსხვერპლა

ადგილობრივების ინფორმაციით, ცეცხლი საცხოვრებელ სახლს, გვიან ღამით გაუჩნდა.

გამგებლის წარმომადგენელი სოფელში, პეტროს ვართანიანი ამბობს, რომ ღამით, 01:00 საათზე, ცეცხლი მეზობელმა შენიშნა და მას დაურეკა: "მე გამოვიძახე სახანძრო სამსახური, ხუთი ბრიგადა მუშაობდა. მაგრამ, რომ გავიგეთ ხანძარი, სახლი თითქმის უკვე მთლიანად იყო ჩამწვარი და შიგ მყოფების გამოყვანა შეუძლებელი იყო".

გამგებლის წარმომადგენლის ინფორმაციით, ხანძრის შედეგად მამა–შვილი, 82 წლის მამა და მისი 58 წლის ქალიშვილი გარდაიცვალნენ. ისინი სახლში მარტო ცხოვრობდნენ. ცხედრები პროზექტურაშია გადასვენებული.

საქართველოს შინაგან საქმეთა სამინისტროს ინფორმაციით, მომხდარზე ძიება სისხლის სამართლის კოდექსის 187–ე მუხლით დაიწყო, რაც სხვისი ნივთის დაზიანებას ან განადგურებას გულისხმობს.

[sknews.ge]