„ხუთსართულიანების“ დასახლებას წყალი შეფერხებით მიეწოდება

დღეს, 5 ივლისს, კოსტავას ქუჩზე, „ხუთსართულიანების“ მთელს დასახლებას წყალი დილიდან შეუწყდა. ადგილობრივები ამბობენ, რომ ბოლო დღეების განმავლობაში მათ წყალი გეგმის მიხედვით აღარ მიეწოდებათ.

„ხან დილის საათებში გვიწყდება წყალი, ხან საღამოს. წინასწარ არავინ გვაფრთხილებს, როცა პრობლემაა, შესაბამისად არც მარაგი გვაქვს ხოლმე და ვრჩებით უწყლოდ“ – ამბობენ „ხუთსართულიანების“ მცხოვრებლები.

„გაერთიანებული წყალმომარაგების კომპანიის“ სამცხე–ჯავახეთის ფილიალის მენეჯერი ბორის სპანდერაშვილი განმარტავს, რომ პრობლემის მიზეზი წყლის არასაკმარისი წნევაა.

„ურაველში, წყლის სათავო ნაგებობაში, მაღალი ტემპერატურების გამო, წყალი დამშრალია და შესაბამისად, დიდი წნევით ვერ მიეწოდება. გარდა ამისა, ხალხი ბაღებს რწყავს. წყალს დიდხანს უშვებენ ხოლმე. ამის გამოა, რომ წყალს დიდი წნევა აღარ აქვს“, – ამბობს ბორის სპანდერაშვილი.

როგორც წყალმომარაგების კომპანიაში ამბობენ, პრობლებას სხვა აბონენტებისათვის წყლის მიწოდების შეზღუდვით მოაგვარებენ:„ ვისაც 24 საათი მიეწოდება წყალი, სავარაუდოდ, მათ შედარებით შევუზღუდავთ მიწოდებას, რათა მათ ხარჯზე სხვებთან გამოვიდეს წყალი და წნევაც მეტი იყოს“.

[მარიამ ბარძიმაძე, ახალციხე]