ვალეს სამი დღეა სასმელი წყალი არ მიეწოდება

ვალეში ადგილობრივები სასმელ წყალს ერთ–ერთი წყაროდან ხელით ეზიდებიან. თუმცა ამბობენ, რომ ესეც დაბინძურებული და სასმელად უვარგისია.

„სამი დღეა წყლი წვეთი არ მოსულა, სასმელად, ჭურჭლისთვის ხომ გვინადა, ასე როგორ შეიძლება?! ეზოში ბოსტნეულის მორწყვაზე აღარ ვლაპარაკობთ, ყველაფერი ჩამხმარია“, – გვეუბნება ვალის მკვიდრი მაყვალა მანველიშვილი.

ადგილობრივები ამბობენ, რომ სასმელი წყლის პრობლემა ბოლო სამი წლის განმავლობაში არა ერთხელ დადგა.

„შარშანაც ასე იყო, ბოლო წლებია სულ ასე ვართ. ვედროებით რამდენი შეიძლება ვზიდოთ, ჩვენი პატრონი არავინაა!“ – ამბობს ადგილობრივი მარიამ ნასყიდაშვილი.

„საქართველოს გაერთიანებული წყალმომარაგების კომპანიის“ სამცხე–ჯავახეთის რეგიონული ფილიალის მენეჯერი ბორის სპანდერაში აცხადებს, რომ წყლის სატუმბზე ტექნიკური ხარვეზები იყო: „თანამშრომლები უკვე გასულები იყვნენ და მოაგვარეს. ვალის მოსახლეობა წყალს ჩვეულ რეჟიმში მიიღებს“.

ვალის მოსახლეობა სასმელი წყლით მდინარე ფოცხოვიდან მარაგდება, რომლის სატუმბი სადგურიც ვალის მეორე შახტის ტერიტორიაზე მდებარეობს.







[ლუბა გიორგაძე, ახალციხე]