ახალციხეში, „ხუთსართულიანებში“ წყალი მხოლოდ ღამე მოდის

ახალციხეში „ხუთსართულიანების“ დასახლებას წყალი 24 საათი მიეწოდებოდა, თუმცა, თვეზე მეტია აქ წყალი მხოლოდ ღამე, 10:00 საათიდან დილამდე მოდეს. წყალს წნევა კი მხოლოდ გამთენიისას ემატება, ზედა სართულებზე წყალი არ ადის, პირველ სართულზე კი სარეცხის მანქანაც არ ირთვება.

„გამთინიას შეიძლება მოემატოს ნარპორი, მანამდე წვეთავს. შაუღამეს ხომარ უნდა ველოდო იმისთვის, რომ მანქანა ჩავრთო და დავიბანო?! წყალი თუ არ მოდის ისე სახლში ვერაფერს ვაკეთებთ და ველოდებით დაღამებას“, – ამბობს „ხუთსართულიანებში“ მცხოვრები ნანა ინასარიძე.

ადგილობრივების თქმით, მათ ამ პრობლემის შესახებ წყალმომარაგების კომპანიის ცხელ ხაზზე არა ერთხელ დარეკეს, თუმცა პასუხი, როდის შეიძლება მოგვარდეს ეს საკითხი, ვერ მიიღეს: „ბაღებს რწყავენ, გაშვებული აქვთ მთელი დღეს და ჩვენთან იმიტომ აღარ მოდის. ამას თუ მიხედავენ წყალი დღე ჩვენთანაც მოვა“.

ადგილობრივებს ეთანხმებიან საქართველოს გაერთიანებული წყალმომარაგების კომპანიის სამცხე–ჯავახეთის ფილიალიში. როგორც უწყების მენეჯერი ბორის სპანდერაშვილი ამბობს, „ხუთსართულიანებში“ წყლის პრობლემა მოსახლეობის დაუდევარი ქცევითაა გამოწვეული: „დღე წყალი ბაღბში აქვთ გაშვებული, ამიტომ წნევა აღარ ყოფნის, ღამით კი აღარ რწყავენ და ზედა სართულებამდეც აღწევს“.

მისი თქმით, ეს პრობლემა რწყვის სეზონზე ყოველთვისაა: „კანონით არ მაქვს უფლება, რომ მაგის გამო ვინმე დავაჯარიმო, ან რაიმე სხვა ღონისძიებას რომ მივმართო. ეს ხალხის თვითშეგნებაზეა დამოკიდებული და უბრალოდ ასე აღარ უნდა მოიქცნენ“, – ამბობს სპანდერაშვილი.

„ხუთსართულიანების“ დასახლებაში კი აცხადებენ, რომ ივლისში წყლის ფულს აღარ გადაიხდიან: „არც მე გადავიხდი და არც სხვები, საინტერესოა რას იზამენ, ყველას ერთად ჩაგვიჭრიან?!“ – კითხულობს მაია შერგელეშვილი.



[მარიამ ბარძიმაძე, ახალციხე]