ვალის მოსახლეობას წყალი არ მიეწოდება

ვალის მოსახლეობას წყალმომარაგება 15 აპრილს შეუწყდა და უკვე მეორე დღეა უწყლოდ არიან. ადგილობრივები ამბობენ, რომ მსგავსი პრობლემა ხშირად აქვთ, წყლის დაწყვეტის შესახებ კი წინასწარ არავინ აფრთხილებთ – "ვიკითხეთ რატომ არ გვაქვს წყალიო და ასე გვითხრეს, რაღაც პრობლემაა და ხვალ დილიდან აღდგებაო, თუ არადა ზეგ მაინცო. მანამდე რა უნდა ვქნათ? სასმელი, დასაბანი, დასარეცხი წყალი საიდან მოვიტანოთ?", – კითხულობენ ადგილობრივები.

"გაერთიანებული წყალმომარაგების კომპანიაში" განმარტავენ, რომ მდინარე ფოცხოვში წყლის დონემ დაიწია, რის გამოც, სათავე–ნაგებობაში წყალი ვეღარ შედის. მათივე თქმით, ამ დროისათვის პრობლემის მოსაგვარებლად სამუშაოები მიმდინარეობს.

"მთელი ღამის განმავლობაში გაგრძელდება სამუშაოები, ხელოვნურად მოხდება სათავე–ნაგებობის წყლით გამდიდრება. ხვალ დილით ადგილობრივებს წყალი განრიგით მიეწოდებათ",– ამბობს ტექნიკური აქტივების მართვის დეპარტამენტის უფროსი მიხეილ თათარაძე.

იმ შემთვევაში თუ 16 აპრილს, ვალის წყლით მომარაგება ვერ აღდგება, კომპანიაში ამბობენ, რომ ადგილობრივებს წყალს წყალმზიდების მეშვეობით მიაწვდიან.

[მარიამ ბარძიმაძე, ახალციხე]