ვალის მოსახლეობას წყალი წყალმზიდებით მიეწოდება

დღეს, 17 აპრილს, ვალეში დიდი მოცულობის ავზების მქონე მანქანებით წყალს არიგებენ. სამდღიანი უწყლობის შემდეგ, გაერთიანებული წყალმომარაგების კომპანიამ დასახლებაში სამი წყალმზიდი მანქანა გაუშვა, მათგან ერთი ქუთაისიდან ჩამოიყვანეს.

"წყალმზიდებმა უკვე დაიწყეს მუშაობა. ერთი მანქანა ადგილობრივი სერვისისაა, ერთი მუნიციპალიტეტის და კიდევ ერთი ქუთაისიდან მოდის", – ამბობს საქართველოს გაერთიანებული წყალმომარაგების კომპანიის ტექნიკური აქტივების მართვის დეპარტამენტის უფროსი მიხეილ თათარაძე.

მისივე თქმით, მაცხოვრებლებისთვის წყლის მიღების ოდენობა შეზღუდული არ არის.

შეგახსენებთ, რომ ვალის მოსახლეობას წყლის მიწოდება 15 აპრილს შეუწყდა. ადგილობრივები ამბობენ, რომ მსგავსი პრობლემა ხშირად აქვთ, წყლის დაწყვეტის შესახებ კი წინასწარ არავინ აფრთხილებთ.

გაერთიანებული წყალმომარაგების კომპანიაში პრობლემის მიზეზად, მდინარე ფოცხოვზე წყლის დონის დაწევას ასახელებენ. მათი თქმით, ამ ეტაპზე, სამუშაოები მიმდინარეობს, თუმცა მათი დასრულება დროულად ვერ ხერხდება.

"სამუშაოები კვლავ მიმდინარეობს. ჩვენ ყოველდღიურად ველოდებით ფოცხოვიდან წყლის შემოდინებას, უკვე ხელოვნური გამდიდრებაა დაწყებული და ველოდებით წყლის შემოსვლას", – აცხადებენ წყალმომარაგების კომპანიაში.

[მარიამ ბარძიმაძე, ახალციხე]