ახალციხეში გამრეკელის ქუჩაზე კანალიზაცია ამოდის

გამრეკელის ქუჩაზე საკანლიზაციო მილი დაზიანდა. ადგილობრივების თქმით, მიზეზი აქ გზის მიმდინარე სამშენებლო სამუშაოებია:

„ასფალტს აგებენ და დააზიანეს. ისეც ძალიან ძველი საკანალიზაციო მილებია, აქამდეც გამოსაცვლელი იყო“, – ამბობენ გამრეკელის ქუჩის მცხოვრებლები.

აღნიშნულ ქუჩაზე ასფალტს ახალციხის მერიის მიერ გამოცხადებულ ტენდერში გამარჯვებული კომპანია „მესხეთავტოგზა“ აქგებს. 392 000 ლარზე თვითმმართველობამ ხელშეკრულება მშენებელთან 13 ივნისს გააფორმა.

„მესხეთავტოგზის“ ხელძღვანელის თამაზ პეტაშვილის თქმით, აქ მილი მართლაც სამშენებლო სამუშაოების გამო დაზიანდა: „მძიმე ტექნიკამ რომ გაიარა ვერ გაუძლო და გასკდა. აშკარად ძველი და გამოსაცვლელი მილებია“.

პეტაშვილმა, როგორც თავად აცხადებს, მილის დაზიანების შესახებ „გაერთაინებული წყალმომარაგების კომპანიაში“ ტექნიკური ჯგუფის უფროსს შეატყობინა: „დავურეკე და ვუთხარი რომ მილი გასკდა და გაეკეთებინათ“.

გაერთიანებული წყალმომარაგების კომპანიის სამცხე–ჯავახეთის ფილიალის მენეჯერი ბორის სპანდერაშვილი ამბობს, რომ აღნიშნული დაზიანების შესახებ ბაზაში განაცხადი არ იძებნება, ტექნიკური ჯგუფის ის ხელმძღვანელი კი, რომელთანაც ზეპირი შეთანხმება მოხდა, კომპანიაში აღარ მუშაობს.

„ადგილზე უკვე გავიდა ჯგუფი, დიდი დაზიანებაა და მის მოგვარებას დრო დასჭირდება. ერთ კვირაში პრობლემას აღმოვფხვრით. 5 საკანალიზაციო ჭაა შესაცვლელი. თან ძალიან დაზიანებულია მილები, ძველია და ამორტიზირებული“, – ამბობს სპანდერაშვილი.





[მარიამ ბარძიმაძე, ახალციხე]