კოსტავას ქუჩაზე გარევაჭრობა იკრძალება და ტროტუარი ეწყობა

ახალციხის მერიამ რამდენიმე თვის წინ დაანონსებული ქალაქის ცენტრალური ქუჩის რეაბილიტაცია დაიწყო. ამ დროისათავის კოსტავას ქუჩის ნაწილში აყრილია ასფალტი და მოშლილია მაღაზიაში შესასვლელი კიბეები.

ქალაქის მერი ვლადიმერ ზედგინიძე აცხადებს, რომ თანამედროვე, ევროპული სტანდარტების ქუჩის მოწყობას აპირებს, სადაც დაიგება ქვაფენილი, გაკეთდება მოსაცდელები, ავტომანქანების პარკინგი, ახალი გარეგანათებები და რაც მთავარია, კოსტავს ქუჩა ადაპტირებული იქნება შშმ პირებისათვის.

„ჩვენ თუ ევროპული ცხოვრებისთვის მივისწრაფით და ვამბობთ, რომ გვინდა ევროპაში შესვლა, ევროპული ფასეულობით უნდა შევიდეთ“,–აცხადებს ზედგინიძე.

ქალაქის მერი ამბობს, რომ ახალციხეში ყველაზე პრობლემური ქუჩა, სწორედ კოსტავს ქუჩაა, რადგან მაღაზიების კიბეები ტროტუარებზეა გადმოდგმული და გარევაჭრობაა, რაც ფეხითმოსიარულეთა გადაადგილებას აფერხებს: „აქ ჩვეულებრივი სავაჭრო ბაზრობაა მოწყობილი“.
მისივე თქმით, აღნიშნულზე, მცირე მეწარმეებმა ბოლო პერიოდში არაერთი გაფრთხილება მიიღეს, თუმცა ვიდრე სარეაბილიტაციო სამუშაოები არ დაიწყო, მათი მოთხოვნა არ გაუთვალისწინებიათ.

თავად მოვაჭრეები „სამხრეთის კარიბჭესთან“ ირწმუნებიან, რომ კიბეების აყრის შესახებ მათ, დღეს დილით გაიგეს, როდესაც მაღაზიაში სამუშაოდ მივიდნენ. მიუხედავად უკმაყოფილებისა, მათ ქალაქის მერთან, რომელიც სამუშაოების დასათვალიერებლად მივიდა, პროტესტი არ გამოუხატავთ.

უმეტესობა „სამხრეთის კარიბჭესთან“ კომენტარის გაკეთებისგან თავს იკავებს, ზოგი მათგანი კი ამბობს, რომ ცვლილებები მათ მყიდველების რაოდენობას შეუმცირებს, რაც ბიზნესს აზარალებს.

„რომ არ დავალაგო გარეთ, არც ვაჭრობა მექნება. მერს კარგი ხელფასი აქვს, მე კიდე წამლის ფულიც არ მაქვს. კიბეებიც რომ მოგვინგრიეს, იხტუნაონ ამ სიმაღლეზე კლიენტებმა?“–გვეუბნება ერთ–ერთი მოვაჭრე.

მიუხედავად მოვაჭრეების ამ პოზიციისა, ახალციხის მერი ამბობს, რომ ფეხით მოსიარულეთათვის გზა უნდა გამოთავისუფლდეს და ცენტრალური ქუჩა ისეთი გადატვირთული არ უნდა იყოს, როგორიც ახლაა.

„რა თქმა უნდა წინააღმდეგობები იქნება, ვიღაცამ როდისღაც თუ მათ დაუდევრობით დართო ნება აქ კიბეები გადმოედგათ, ტროტუარის ხარჯზე, ჩვენთვის ეს გასაგებია, მაგრამ აუცილებლად, ეს ტროტუარი ფეხით მოსიარულეებისთვის უნდა გამოვათავისუფლოთ,“–ამბობს ვლადიმერ ზედგინიძე.

მისივე თქმით, მოვაჭრეებს საშუალება ექნებათ, ტროტუარზე მაღაზიის კიბე მხოლოდ 10 სანტიმეტრით გადმოწიონ.

ახალციხის ცენტრალური ქუჩაზე სარეაბილიტაციო სამუშაოები ადგილობრივი ბიუჯეტიდან ფინასდება. სამუშაოებს ტენდერში გამარჯვებული კომპანია „მესხეთ ავტოგზა“ 300 ათას ლარად აკეთებს. სამუშაოები სამ თვეში უნდა დასრულდეს.









[ლუბა გიორგაძე, ახალციხე]