მეწარმეებს ტროტუარების 'გათავისუფლება' მოუწევთ – მერია კოსტავას ქუჩის შეკეთებას იწყებს

ახალციხის მერიამ კოსტავას ქუჩის რეაბილიტაციისთვის ტენდერი 18 აპრილს, 370 000 ლარზე გამოაცხადა. როგორც ადგილობრივ თვითმმართველობაში განმარტავენ, ამ თანხით კოსტავას ქუჩის ტროტუარების და ამავე ქუჩაზე ექვსი კორპუსის ეზოს რეაბილიტაცია იგეგმება.

შეგახსენებთ, რომ კოსტავას ქალაქის ცენტრალური ქუჩის ტროტუარებზე გადმოდმული მაღაზიების კიბეების შეწევაზე ახალციხის მერმა მიმდინარე წლის იანვარში ისაუბრა. მერის ინიციატივამ სავაჭრო ობიექტების მეპატრონეების უკმაყოფილება გამოიწვია, ისინი აცხადებდნენ, რომ ყველა დოკუმენტი კანონთან შესაბამისობაში ჰქონდათ და კიბეების შეწევას არ აპირებდნენ.

ვლადიმერ ზედგინიძის განმარტებით, მაღაზიების მეპატრონეებს კიბეების შეწევას კიდევ ერთხელ სთხოვენ, რადგა მათ უმეტესობას მშენებლობის ნებართვა კანონდარღვევით აქვთ.

„ჩვენ ვთხოვთ ისევ, რომ შეწიონ კიბეები. ცოტა მოქალაქეების მხრიდან იყო აგრესია, თუმცა, იმედი მაქვს, რომ დაგვთანხმდებიან. ცენტრალურ ქუჩაზე შშმ პირებს გადაადგილებს საშუალება არ აქვთ. ამ ადამიანების მიმართაც გამოვიჩინოთ გულისმხიერება“, – ამბობს ვლადიმერ ზედგინიძე.

კოსტავას ქუჩის რეაბილიტაციისთვის ადგილობრივმა თვითმმართველობამ ტენდერი ორჯერ გამოახადა, თუმცა ვერ შედგა. ახალი ტენდერი, რომლის სავარაუდო ღირებულება 370 000 ლარია, კოსტავას ქუჩის ორივე მხრის ტროტუარის, ასევე, №12, №18, №77, №41, №43 და №45- ში ეზოების მოასფალტებას და კეთილმოწყობას გულისხმობს.

[თინათინ ზაზაძე, ახალციხე]