ახალციხეში ცენტრალური ქუჩის რეაბილიტაცია იწყება

კოსტავას ქუჩის კილომეტრნახევრიან მონაკვეთზე 923 მეტრი მოასფალტდება. რეაბილიტაცია თამარ მეფის ძეგლთან ახლოს მდებარე ხიდებიდან მერიის შენობამდე არსებულ ტერიტორიაზე ჩატარდება. ამისთვის ახალციხის მერიამ ტენდერი 30 აგვისტოს გამოაცხადა. სამშენებლო სამუშაოების შესყიდვის სავარაუდო ღირებულება 447 244 ლარია.

სატენდერო დოკუმენტების მიხედვით, სარეაბილიტაციო მონაკვეთის გასწვრივ, გზის ორივე მხარეს მოასფალტდება არსებული მიერთებებიც.

როგორც საპროექტო დოკუმენტებში ვკითხულობთ, აღნიშნული მონაკვეთი დაზიანების სიმძიმის გამო ორმულ შეკეთებებს აღარ ექვემდებარება, ამიტომ გზის ზედაფენა მთლიანად მოიხსნება და ახალი საფარი მოეწყობა. გაკეთდება სანიაღვრე არხებიც.

ტენდერში გამარჯვებულმა კომპანიამ სამუშაოები, ხელშეკრულების გაფორმებიდან 50 დღის ვადაში უნდა შეასრულოს.

ახალციხის მუნიციპალიტეტის მერია, უახლოეს დღეებში ტენდერის გამოცხადებას გეგმავს რუსთაველის ქუჩაზე არსებული დაზიანებული მონაკვეთების რეაბილიტაციისთვისაც.

[ლუბა გიორგაძე, ახალციხე]