ადიდებულმა ღელემ სოფელ აწყვიტაში გზა და ნათესები დატბორა

სტიქიამ აწყვიტას გუშინ შეუტია, დღეს დილიდან კი ასპინძის გამგეობის ინფრასტრუქტურის სამსახურის წარმომადგენლებმა სტიქიისაგან მიყენებული ზარალის შესწავლა დაიწყეს.

როგორც სოფელში გამგებლის წარმომადგენელი თამაზ ივანიძე „სამხრეთის კარიბჭესთან“ აცხადებს, ძლიერი წვიმის შედეგად სოფელ ქუნცასა და აწყვიტის დამაკავშირებელ გზასთან მდებარე ღელე ადიდდა, რამაც ნათესებთან და სათიბებთან მისასვლელი გზა დატბორა და დააზიანა: „თითქმის ერთ კილომეტრამდე გზა სულ დაითხარა, ამას შეკეთება უნდა, ადგილობრივებმა ნათესებსა და სათიბებში მისვლა რომ შეძლონ“.

თამაზ ივანიძის განმარტებით, დატბორილია ერთ–ერთი ადგილობრივის ეზოც, თუმცა წყალი სახლში არ შესულა.

მისივე თქმით, ღელეს დამცავი ჯებირები არ აქვს და იმ შემთხვევაში თუ სტიქია კიდევ განმეორდება, დატბორვის საშისროების წინაშე 18 ოჯახი დგას, ისინი, ვინც ღელის მიმდებარე ტერიტორიაზე ცხოვრობენ: „ვფიქრობთ რამენაირად გავამაგროთ ღელე, რომ აღარ განმეორდეს. გარშემო ადგილობრივები ნაგავს ყრიან და ეგეც გასაწმენდია. გამგებელს ვეტყვი ამის შესახებ, იმედია რამე ზომებს მიიღებს“.

ასპინძის გამგებლის მოადგილის ალექსანდრე პაპაშვილის განმარტებით, ადგილზე გამგეობის წარმომადგენლები მუშაობენ და სტიქიის შედეგებზე რეაგირება ზარალის შესწავლის შემდეგ დაიწყება.

[ლუბა გიორგაძე, ასპინძა]