გუჯა ბიჭაშვილი: რაბათის თემაზე აჟიოტაჟი დასრულებულია

კულტურის სამინისტროში დღეს გამართულ შეხვედრას ახალციხის ციხის წარმომადგენლებთან ერთად ციხის ახალი დირექტორი გუჯა ბიჭაშვილიც ესწრებოდა. როგორც ბიჭაშვილი ამბობს, რაბათის თემასთან დაკავშირებით გამართულ მრგვალ მაგიდასთან ყველა ის საკითხი განიხილეს, რაზეც ბოლო პერიოდში აჟიოტაჟი ატყდა.

”აქ იყო ყველა თემა განხილული, თუმცა ძირითადი საკითხი იყო იმ დეტალების აღმოფხვრა, რომელიც დარჩა დაუსრულებელი. მაგალითად, სადრენაჟე არხების პრობლემა, ასევე, ციტადელზე, საკონფერენციო დარბაზში და რესტორანში წვიმა რომ ჩამოდის. ან კიდევ კედელი რომ გადახსნილია და ასე შემდეგ. ამ საკითხებზე იყო აქცენტი გაკეთებული”, - განაცხადა გუჯა ბიჭაშვილმა და დაამატა, რომ მშენებლობები უხარისხოდაა გაკეთებული და ამ საკითხს კულტურის სამინისტრო შეისწავლის, - გუშინ ჩამოსული იყვნენ სამინისტროს წარმომადგენლები, რომლებმაც ტექნიკური ხარვეზები დაათვალიერეს, შისწავლეს და ეს ინფორმაცია სამუშაო ჯგუფს გადასცეს. შემდეგ სამუშაო ჯგუფი ჩამოვა ისევ აქ და ამ დეტალების აღმოფხვრაზე იმუშავებს”.

მისივე თქმით, სხვა რაიმე სახის სამუშაოები ახალციხის ციხის ტერიტორიაზე არ იგეგმება: ”არაფერი ის, რომ იქ რაღაცას სახურავი ეხდება და მსგავსი რამე. ეს აჟიოტაჟი დასრულებულია”.

ახალციხის ციხის დირექტორი ნაციონალური მოძრაობის გენერალური მდივნის ვანო მერაბიშვილს გამოსვლასაც გამოეხმაურა.

”რაც შეეხება ვანო მერაბიშვილის იქ მობრძანებას ეს იყო სასაცილო. იქ ინციდენტი მოხდა ჩემსა და მას შორის, რადგან მე ვუთხარი, რომ თქვი სიმართლე და სიმართლის გარდა არაფერი, რაზეც ის წამოხტა და იკივლა”, - ამბობს გუჯა ბიჭაშვილი.

მისივე თქმით, ამ ეტაპზე რაბათის საკითხთან დაკავშირებით სხვა რაიმე სახის შეხვედრა ან განხილვა არ იგეგმება.

[თამარ თოთაძე, ახალციხე]