‘გაგვანადგურა, ქვა–ქვაზე არ დატოვა’ – დასეტყვილ ხეოთელებს გამგეობა რეკომენდაციებით ‘ეხმარება’

სტიქიიდან მეორე დღეს სოფელ ხეოთში ჯერ კიდევ სეტყვის სქელი ფენა დევს. გზებზე აყვავებული ხე–ხილის დამტვრეული ტოტები ყრია, ყანებში კი კარტოფილი, ხახვი, ლობიო და ქერი მიწასთანაა გასწორებული. სეტყვამ, რომელიც სოფელში ნახევარ საათზე მეტხანს გრძელდებოდა, ადგილობრივები ლუკმა–პურის გარეშე დატოვა.

„7 000 მეტრზე მეთესა ხორბალი, თავები აქვს წაწყვეტილი. 8 000 მეტრზე კარტოფილი მქონდა, ყველაფერი მოისპო, აღარაფერი გვაქვს, ლობიო, ხახვი, ნიორი... საშინელება იყო, 30 წუთი გრძელდებოდა სეტყვა, მერე წვიმა დაიწყო“, – ამბობს ხეოთელი დოდო ინასარიძე.

ინასარიძეებს მოსავლის გარდა ის სათბური დაუზიანდათ, რომელშიც ნერგები გამოყავდათ, ოჯახის წევრები სეტყვის ნარჩენებს ეზოდან მეორე დღეა ზიდავენ: „სეტყვის სიმძიმეს ვერ გაუძლო რკინებმა და ჩაიღუნა. ასეთი არაფერი მახსოვს, 20 სანტიმეტრზე იდო სეტყვა“.

ინასარიძეების მსგავსად მოსავლის გარეშე დარჩა ნუგზარ გვრიტიშვილის ოჯახიც: „ხეებზე ეტყობა რა დღეშიც ვართ, ზამთარში რომ იყო, ისე გამოყურება“.


სალომე ჯვარიძე

მოსავალთან ერთად სეტყვამ სახლის სახურავი დაუზიანა 89 წლის სალომე ჯვარიძეს, რომელიც სახლში მარტო ცხოვრობს: „მოვიდნენ გამგეობიდან, სურათი გადაიღეს და წავიდნენ, სურათი მიშველის?! ნახეთ რა დღეში ვარ, როგორც გარეთ წვიმდა, ისე ჩემს სახლში“.

სეტყვისგან დაზიანებული სახურავიდან ჩამოსულ წყალს მთელი ღამის განმავლობაში ზიდავდა მარტოხელა, 68 წლის მანანა ჩოხელიც. ზამთარში თოვლის სიმძიმისგან დაზიანებული სახურავი, ახლა სეტყვამ უარეს მდგომარეობაში ჩააგდო: „ეგეთი სეტყვა არ მინახავს, 68 წლის ქალი ვარ. მთელი კედლები და ჭერი დაზიანდა, ფქვილიც დამისველდა, ოთახებში ტბასავით წყალი იდგა მთელი ღამე. გამგეობიდან იყვნენ, მითხრეს მასალას გამოგიყოფთო, მე როგორ წავიდე ტყეში, სახურავს რომ მომცემენ, სად დავაწყო?!“


მანანა ჩოხელი

300 ძირი ნერგიდან მხოლოდ ტოტებია დარჩენილი ფიქრია გვირჯიშვილის ნაკვეთში: „რაც გვქონდა ყველაფერი დავთესთ, ახლა აღარც ნერგი გვაქვს და აღარც თესლი, არ ვიცით რა გვეშველება“.

ხეოთელების ნაწილს ნაკვეთები, სადაც კარტოფილი, სიმინდი და ლობიო ეთესა, ნაქირავები ჰქონდა. ადგილობრივები ამბობენ, რომ წელს ქირის ფულსაც ვერ მოაგროვებენ.

„გაგვანადგურა, ქვა–ქვაზე არ დატოვა, ყველაფერი მოსპო. ამ ყანების იმედზე ვიყავი. გუშინდელი დღის მერე ვტირივარ. 600 კილო კარტოფილი და 20 კილო ლობიო, მარტო იმ ოჯახს უნდა მივცე, ვინც ყანა მომაქირავა“, – ამბობს ლია ზაზაძე.


ლია ზაზაძე

ახალციხის მუნიციპალიტეტის სოფელ ხეოთში ძლიერი სეტყვა გუშინ, 31 მაისს საღამოს მოვიდა და 30 წუთზე მეტხანს გაგრძელდა. სოფელში გუშინვე ავიდნენ ახალციხის გამგეობის წარმომადგენლები.

როგორც ადგილობრივ თვითმმართმმართველობაში აცხადებენ, სეტყვის შედეგად ადგილობრივებს ინფრასტრუქტურული ზარალი არ მიუღიათ, ხოლო ნათესების და ხეხილის ზარალს ადგილობრივი თვითმმართველობა ვერ აანაზღაურებს.

„ძირითადად დაზიანებულია ხეხილი და ნათესები. სპეციალისტიც იყო ასული აგრარულ საკითხებში, რამინ მარტინენკო, რომელმაც რეკომენდაციები მისცა ხალხს და დაზღვევაზე ესაუბრა. სეტყვის შედეგად სახლის სახურავები არ დაზიანებულა“, – აცხადებენ თვითმმართველობაში.



რამდენად უშველის დაზარალებულებს რამინ მარტინენკოს რეკომენდაციები, ძნელი სათქმელია. ადგილობრივები ამბობენ, რომ ადგილობრივი ხელისუფლებისგან დახმარება სწორედ ახლა უნდათ.

„კითხულობენ დაზღვევა გაქვთო?!იმას რატომ არ კითხულობენ როგორ დავაზღვიოთ, 3 ლარს კარტოფილის თესლში ვიხდით და 1 ლარადაც ვერ ვყიდით. სარდაფი ტონობით კარტოფილით მაქვს სავსე. კახეთში რომ ეხმარებიან ,ჩვენ ხალხი არ ვართ?! არ გვინდა მათი დახმარება, რასაც ვწვალობთ და ვჯახირობთ, იმას მაინც ქონდეს ფასი“, – აცხადებს ეთერ ვეშაგური.

როგორც ადგილობრივებთან გავარკვიეთ, ხეოთში ნათესები და ხეხილი არავის აქვს დაზღვეული. შესაბამისად, მათ არც სადაზღვევო კომპანიის და არც გამგეობის დახმარების იმედი აღარ აქვთ.




„რამდენიმე კვირის წინ მოვიდნენ, გვითხრეს სადაზღვეო კომპანიიდან ვართო, ჩაიწერეს ვის სად რა გვეთესა და იმის მერე აღარავინ გამოჩენილა“, – აცხადებენ ადგილობრივები.

„100 პროცენტით დაზიანდა ყველაფერი საარსებო წყარო მოგვესპო, მშიერები დავრჩით“, – ჩივიან ხეოთში.



[თინათინ ზაზაძე, ახალციხე]