სტიქია ლელოვანში – დახოცილი ფრინველი და განადგურებული ნათესები

სოფელ ლელოვანში მცხოვრებმა წინწკალაძეებმა მიმდინარე წლის გაზაფხულზე სესხი აიღეს და სათესლედ კარგი ხარისხის კარტოფილი შეიძინეს. ოჯახმა კარტოფილი 4 ათას მეტრზე დათესა. გუშინ, 11 ივნისს მოსულმა სეტყვამ კი ნათესი მთლიანად გაუნადგურათ.

„მოსავალის იმედი მქონდა რომ გადავიხდიდი. მიწასთან არის გასწორებული ყველაფერი. არ ვიცით რა გვეშველება. სახლის სახურავი დაზიანდა, ფანჯრებია ჩამტვრეული. მთელი სოფელი ძალიან ცუდ დღეშია“, – ამბობს მალვინა წინწკალაძე და ამატებს, რომ სტიქიამ გაუნადგურა არამხოლოდ კარტოფილის ნათესი, არამედ, 2.500 მეტრზე დათესილი სიმინდი და ლობიოც.

ლელოვნელები ამბობენ, რომ სეტყვა დაახლოებით 17:00 საათზე დაიწყო და ნახევარ საათს გაგრძელდა. მოვარდნილმა წყალმა ადგილობრივებს შინაური ფრინველი დაუხოცა. განადგურდა ხეხილი და ნათესები.



„20 წიწილიდან 4 დამრჩა. სააშინელი ამინდი იყო, უცებ დაიწყო სეტყვა. ეზოში მწვანილიც არ გადარჩა“, – გვეუბნება ხათუნა გუბელაძე და დამხრჩვალ წიწილებს გვიჩვენებს.

წვიმამ და სეტყვამ საცხოვრებელი სახლი დაუზიანა სოციალურად დაუცველ ლომთაძეების ოჯახს. დაზიანებული სახურავიდან წყალი ოთახებშიც ჩავიდა.

„ყველაფერი დამისველდა, როგორც გარეთი იყო სეტყვა, ისე სახლში“, – ამბობს ნინო ლომთაძე.

სრულად გაუნადგურდა ნათესები ჩიტორელიძეებს.

„პომიდორი, კომბოსტო, ხახვი, ბოსტანში ყველაფერი განადგურებულია. კაკალი ძირს ყრია, ვაზს ფოთლებიც კი არ აქვს შერჩენილი. 4 ბატის ჭუკი გაგუდა წყალმა. ჩემი მეუღლე იყო მინდორში გასული და სიმინდი, ლობიო და კარტოფილი ფაქტიურად აღარ არსებობს. ამბობენ თურქეთში აქვთ სეტყვის საწინააღმდეგო რადარი დაყენებული და იმიტომ არის ჩვენთან ასე ხშირად სეტყვაო. ვითხოვთ ადგილობრივმა მთავრობამ ყურადღება მოგვაქციოს“, – ამბობს იზოლდა ჩიტორელიძე.



ადიგენის მუნიციპალიტეტის გამგეობაში განმარტავენ, რომ სტიქიის შედეგად დაზიანებულ სოფლებში სპეციალური კომისია უკვე გასულია და ზარალს ითვლის. ზარალი ორი მიმართულებით დაითვლება: ინფრასტრუქტურული და სოფლის მეურნეობის კუთხით. ამის შემდეგ გაირკვევა ვინ და როგორ შეიძლება დაეხმაროს დასეტყვილ ხალხს.

შეგახსნებთ, რომ 11 ივნისს მოსულმა ძლიერმა სეტყვამ და წვიმამ ადიგენის მუნიციპალიტეტის 5 სოფელი დააზრალა. ლელოვანი, დიდი და პატარა სმადა, ენთელი და ამხერი.



[თინათინ ზაზაძე, ადიგენი]