ასპინძის ორი სოფელი ძლიერად დაისეტყვა

ძლიერი სეტყვა ზველსა და ჭობარეთში დაახლოებით 17:30 საათზე დაიწყო. ასპინძის მუნიციპალიტეტის გამგებლის მოადგილის, ალექსანდრე პაპაშვილის განცხადებით სტიქიის შედაგად სასოფლო–სამეურნეო სავარგულები და ხეხილი დაზიანდა.

„სოფლის რწმუნებულს ვესაუბრე და სასოფლო–სამეურნეო კუთხით ყველაფერი გაანადგურა. ხეებზე ფოთლებიც კი არ არის შერჩენილი“, – განაცხადა სატელეფონო საუბარში ალექსანდრე პაპაშვილმა.

მისივე თქმით, სეტყვისგან დაზარალებულ სოფელს რწმუნებული მოინახულებს, იმ შემთხვევაში თუ ინფრასტრუქტურული ზარალი იქნება, გამგეობა ადგილობრივებს სარეზერვო ფონდიდან დაეხმარება.

„თუ ხიდი წაიღო, საცხოვრებელ სახლებს სახურავი ახადა ან დააზიანა, ამას შევისწავლით და შესაბამის რეაგირებას მოვახდენთ. ამ სოფლებში ამ დრომდე წვიმს“, – ამბობს ალექსანდრე პაპაშვილი.

სეტყვა იყო ორგორა–სახუდაბელშიც თუმცა უმნიშვნელოდ, აღნიშნულ სოფლებში მოსახლეობა არ დაზარალებულა.

[თინათინ ზაზაძე, ასპინძა]