ახალქალაქის სოფლები დაისეტყვა

ახალქალაქის მუიციპალიტეტის სოფლებში სტიქია 20 ივლისს, საღამოს 19:30 საათისთვის მოვიდა.

როგორც ადგილობრივები ამბობენ, სეტყვამ ზოლად გადაიარა და სასოფლო–სამეურნეო სავარგულები დაზიანდა ხოსპიოში, მურჯახეთში, ჩანდურაში, ოკამში, ქარცეფსა და მიმდებარე სოფლებში.

მათივე თქმით, სტიქია დაახლოებით 15–20 წუთის განმავლობაში გრძელდებოდა. განადგურდა ჰექტრობით კარტოფილის ნათესები, სადაც ზარალი დაახლოებით 70–80%–ს შეადგენს.

"ძალიან მსხვილი სეტყვა იყო. სახურავიდან ჩამოსული სეტყვის ნარჩენები დილით ჯერ კიდევ არ იყო დამდნარი. დაზიანდა კარტოფილის ნათესები, ხეხილი, კარ–მიდამოებში ვისაც რა ჰქონდა, აბლოლუტურად ყველაფერი განადგურდა", – ამბობს ახალქალაქის საკრებულოს საზოგადოებასთან ურთიერთობის სამსახურის წარმომადგენელი, მახარე მაცუკატოვი.

მისივე განმარტებით, ამ დროისათვის, თვითმმართველობაში ზარალის დამთვლელი კომისია მუშაობს.
მდგომარეობის შესასწავლად, ადგილზე ელოდებიან სამცხე–ჯავახეთის გუბერნატორსაც.



[თაკო ფეიქრიშვილი, ახალქალაქი]