ასპინძაში სამი სოფელი დაისეტყვა

ასპინძაში ამბობენ, რომ სეტყვა 15 წუთზე მეტ ხანს გაგრძელდა და ყველაზე მეტად ხიზაბავრა დაზარალდა.

„მთელი ხეხილი ჩამოყრილია, სულ გაანადგურა ბოსტნეული. ძალიან ძლიერი სეტყვა იყო, აღაფერი გადაურჩა“, – ამბობს ხიზაბავრაში ასპინძის მერის წარმომადგენელი ნოდარ ბაბელაშვილი.

ხიზაბავრისაგან განსხვავებით, შედარებით ნაკლებად დაზარალდა ნიჯგორი.

„ხეხილისა და ბოსტნეულის, დაახლოებით, 30% დაზიანდა. რაც შეეხება საროს აქ ისეთი ძლიერი სეტყვა არ ყოფილა, როგორც ნიჯგორში“, – გვიხსნის მერის წარმომადგენელი ნიჯგორსა და საროში გოჩა ასპანიძე.

მერის წარმომადგენლების თქმით, სტიქიის შესახებ ასპინძის მერიისთვის უკვე ცნობილია და ახლა სოფლებში ზარალის დამთვლელი კომისიის წარმომადგენლებს ელიან.

„ეხლა დამირეკეს წარმომადგენლებმა, სამუშაო საათები დასრულებულია და ზარალის დამთვლელი კომისია ადგილზე ვერ გავა. მე მივდივარ ამ სოფლებში და ვნახავ რა მდგომარეობაა“, – გვითხრა სატელეფონო საუბარში ასპინძის მერის მოადგილემ ლევან ბერიძემ.

[ლუბა გიორგაძე, ასპინძა]