ასპინძის მერის მოადგილე: ‘სტიქიამ მხოლოდ ბოსტნეული და ხეხილი დააზიანა’

ასპინძის მუნიციპალიტეტის მერიის თანამშრომლები დღეს, 12 სექტემბერს დილიდან დასეტყვილ სოფლებში ხიზაბავრაში, საროსა და ნიჯგორში გავიდნენ: „ძირითადად ბოსტნეული და ხეხილია გაფუჭებული, რადგან სასოფლო სამეურნეო სავარგულებზე მარცვლოვანი კულტურები უკვე აღებულია. ახლა ხიზაბავრაში ვართ და მალე დანარჩენ ორ სოფელსაც მოვინახულებთ“, – ამბობს ასპინძის მერის მოადგილე დავით პაპაშვილი.

ასპინძის მერის როსტომ მაგრაქველიძის თქმით, ხიზაბავრაში სოფლის ნაწილია დასეტყვილი: „არაა ცუდი ვითარება, პომიდორია ბოსტნებში დაზიანებული და მწიფე ჭანჭურია ჩამოყრილი".

სარო, ხიზაბავრა და ნიჯგორი, გუშინ 11 სექტემბერს დაისეტყვა. სეტყვა 15 წუთზე მეტ ხანს გაგრძელდა.

[მარიამ ბარძიმაძე, ასპინძა]