სადავო შენობა ხუთი ვეტერანის ოჯახმა დატოვა

ვეტერანების საქმეზე ახალციხის რაიონული სასამართლოს გადაწყვეტილების გასაჩივრების ვადა იწურება. ამ დრომდე გადაჭრით გადაწყვეტილი არ არის ვეტერანები სააპელაციო სასამართლში გაასაჩივრებენ თუ არა პირველი ინსტანციის გადაწყვეტილებას, თუმცა ასეც რომ იყოს აქ ალბათ 9 ვეტერანის ოჯახის ნაცვლად 4 იდავებს. შენობაში ამ დროისთვის მხოლოდ 4 ოაჯხი დარჩა.

„დაკეტილი აქვთ ოთახები და წასულები არიან. ალბათ აღარ იდავებენ ჩვენთან ერთად“, – ამბობს სადავო შენობაში დარჩენილი ოთხი ოჯახიდან ერთ–ერთის დიასახლისი მაია გიორგაძე.

მისი თქმით, აქ ყველაზე რთული ზამთრის გატანა იყო. ამ მძიმე დღეებს კი ავარიულ შენობაში მხოლოდ ოთხმა ოჯახმა გაუძლო. როგორც აქ მყოფები გვიხნიან დღეს პეტრე იბერის N17-ში მხოლოდ გენადი მსხვილიძის, ბესო კაპანაძის, სპარტაკ სეთურიძის და გიორგი მიქელაძის ოჯახები ცხოვრობენ.

„თავშესაფარი ჰქონდათ და წავიდნენ. ჩვენ არსად წასასვლელი არ გვაქვს“, – ამბობს გენადი მსხვილიძის მეუღლე შუშანა კოპაძე.

"მართლა არსად გვაქვს წასასვლელი, თორემ აქ არავინ გაჩრდებოდა, ომის ვეტერანი ორი შვილი მყავს, ნუთუ არ გვეკუთვნის სადმე სულ პატარა თავშესაფარი?!' – კითხულობს გიორგი მიქელაძის დედა რიტა მიქელაძე.

ვეტერანები აცხადებენ, რომ შენობის იძულების წესით დატოვების შემთხვევაში, ასევე იძულებით ქალაქში სხვა ფართის დაკავება მოუწევთ.

„შეგვასახლონ „პაგრანატრიადში“, თუ თვითონ არ იზამენ ამას მაშინ ჩვენ შევალთ. არ დავეძებთ როგორი გარემოა იქ, ნაკლები არც აქ გვაქვს თავზე გვაწვიმს. ორი ღამე არ მიძინია, თაგვი მაცოცდება ხელზე“, – ამბობს ინგა სეთურიძე.

აქ მცხოვრებლები ამბობენ, რომ მათ კონკრეტულად სკოლის ყოფილ შენობაზე პრეტენზია არ აქვთ: „უბრალოდ თავშესაფას ვითხოვთ. არ ვაპირებთ ეს წავართვათ იმას ვისიც არის. რაღაცით დაგვაკმაყოფილონ“.

ავარიულ კოპრუსში სადაც არანაირი კომუნიკაცია და საცხოვრებელი პირობა არ არის 9 ბავშვი ცხოვრობს.

"სამხრეთის კარიბჭე" ვერცერთ მათგანს, ვინც შენობა დატოვა ვერ დაუკავშირდა.

რამდენ ხანს დაყოფს აქ დარჩენილი 4 ოჯახი უცნობია. ახალციხის რაიონულმა სასამართლომ უკვე გადაწყვიტა, რომ მათ შენობა უნდა დაცალონ. გასაჩივრების საკითხი კი ჯერ გადაწყეტილი არ არის.

[თამუნა უჩიძე, ახალციხე]