სოფლებში ექთნის დანიშვნას ითხოვენ

ახალციხის მუნიციპალიტეტის ტერიტორიული ორგანოს რწმუნებულებმა და სამსახურის უფროსებმა მუნიციპალიტეტში არსებული პრობლემები განიხილეს. რწმუნებულების თქმით, რამდენიმე სოფელს ერთი ექიმი და ექთანი ემსახურება. რაც მოსახლეობას პრობლემას უქმნის. ზოგიერთ სოფელში კი ექთანი საერთოდ არ ჰყავთ.

სოფელ პამაჯის ტერიტორიული ორგანოს რწმუნებულის კარლენ კარახანიანის თქმით, სოფელში არსებულ ამბულატორიაში არც ექიმი და არც ექთანი არ ჰყავთ.

ახალციხის მუნიციპალიტეტის გამგებლის მოვალეობის შემსრულებელი ბესიკ ბლიაძე ამბობს, რომ აღნიშნული პრობლემის მოგვარება აუცილებელია.

ახალციხის საზოგადოებრივი ჯანდაცვის ცენტრის ხელმძღვანელის ფატი ხაბულიანის თქმით, ახალციხის მუნიციპალიტეტში დიარეის შემთხვევებმა იმატა. წინა წლებთან შედარებით მიმდინარე წელს დაავადების ათჯერ მეტი შემთხვევა გამოვლინდა. საზოგადოებრივი ჯანდაცვის ცენტრში ამბობენ, რომ დაავადების გამომწვევი მიზეზები ჯერ გამოვლენილი არაა.

დღევანდელ თათბირზე სასოფლო-სამეურნეო ვაუჩერების დარიგებაზეც ისაუბრეს. ახალციხის მუნიციპალიტეტის სოფლის მეურნეობის სამსახურის უფროსის ზაზა ხუციშვილის თქმით, ვაუჩერების დარიგება ორ დღეში დაიწყება. საქართველოს სოფლის მეურნეობის სამინისტროს წარმომადგენლები სოფლის რწმუნებულებს შეხვდებიან და ვაუჩერების შესახებ დეტალურ ინფორმაციას მიაწვდიან.

[ნუკა სტეფნაძე, ახალციხე]