ახალქალაქში პრიორიტეტები შეიცვალა
მთავარი → ეკონომიკა 16.04.2012
ახალქალაქის მუნიციპალიტეტის სოფლების უმეტესობამ ’’სოფლის მხარდაჭერის პროგრამით’’ წყლის პრობლემების მოგვარება გადაწყვიტა
ამ პროგრამის ფარგლებში ახალქალაქის მუნიციპალიტეტს წელს 1 116 150 ლარი გადაეცა. გასულ წელთან შედარებით თანხა 200 000 ლარითაა გაზრდილი.
გასული წლისგან განსხვავებით, წელს ახალქალაქის სოფლების თითქმის ნახევარმა პრიორიტეტად სასმელი და სარწყავი წყლის პრობლემის მოგვარება დაასახელა. საერთო თანხიდან 352 000 ლარი სასმელ, 161 403 ლარი კი სარწყავ წყალზე დაიხარჯება.
სოფლებმა: ბუხაშენი (15 451 ლარი), გომანი (29 805 ლარი), კიროვაკანი (14 295 ლარი), ხოსპიო (14 245 ლარი), მარტუნი (8 040 ლარი), კარტიკამი (39 770 ლარი), აზავრეთი (28 963 ლარი), ჩუნჩხა (9 900 ლარი), პტენა, (9 335 ლარი) - ამ პროგრამიდან მიღებული თანხა მხოლოდ წყლის პრობლემის გადასაწყვეტად გამოყეს .
ხოსპიოს და მარტუნის წყალსადენის სისტემა სოფელ ბავრაზე გადის, ამიტომ წყალს ბავრის მოსახლეობა უფრო იყენებს, ვიდრე ხოსპიოს და მარტუნის. აქედან გამომდინარე, სოფლებმა გადაწყვიტა ახალი წყალსადენი ბავრის გვერდის ავლით გაიყვანონ.
გამოყოფილი თანხა საკმარისი არ არის სოფელ კარტიკამის სასმელი და სარწყავი წყლის პრობლემის მოსაგვარებლად, მაგრამ სამუშაოები მომავალ წელსაც გაგრძელდება. წელს მილებს შეიძენენ და მომავალ წელს დაქსელვითი სამუშაოები შესრულდება.
წელს, სავარაუდოდ, საბოლოოდ გადაწყდება სოფლების კიროვაკანისა და გომანის წყლის პრობლემებიც. წელს დაასრულებენ გასულ წელს დაწყებული წყალსაცავის მშენებლობას სოფელ აზავრეთშიც.
- ’’ჩვენი სოფელი ისეთ ადგილას მდებარეობს, რომ მილებს მიწაში ღრმად ვერ ვდებთ, ამიტომ ზამთარში წყალი იყინება. წელს ვაპირებთ წყალსადენი ახალი გზით გამოვიყვანოთ, ამ მილსადენის სიგრძე 2 კილომეტრია, შევცვლით სარქველებსაც’’, - ამბობს აზავრეთის ტერიტორიული ოლქის წარმომადგენელი შალვა ნახაპეტიანი.
ასევე წყალსადენის მშენებლობას მოხმარდება სოფელ ალავერდისთვის გამოყოფილი 16 934 ლარიც. გასულ წელს 5 კილომეტრი სიგრძის წყალსადენი გაიყვანეს, ამდენივე გაკეთდება წელსაც.
სოფელ არაგვაში, კუთვნილი 18 769 ლარით სატუმბ სადგურს შეიძენენ.
პროგრამა ოთხი წელია რაც მიმდინარეობს. ბევრი სოფელი წუხს, რომ პირველი წლიდანვე არ დაიწყეს გრძელვადიანი პროექტების განხორციელება.
- ’’ის სოფლები, რომელებიც სწორად მუშაობენ, დიდ სარგებელს მიიღებენ’’, - ამბობს ვაან ბატოიანი.
ამ პროგრამის თანხები დაიხარჯება ზოგიერთ სოფელში საპირფარეშოს ასაშენებლად; სატვირთო მანქანების სასწორის რემონტისთვის; რიტუალების სახლებისთვის ინვენტარის შესაძენად და ასე შემდეგ.
მაგალითად, მუნიციპალიტეტის მასშტაბით რიტუალების სახლებისთვის ინვენტარის შესაძენად 257 000 ლარი დაიხარჯება; 33 000 ლარი მოხმარდება კულტურის სახლების რემონტს; სპორტული დარბაზების მშენებლობისთვის დაახლოებით 85 000 ლარია გამოყოფილი. სპორტულ დარბაზებს ააშენებენ სოფლებში კუმურდო და დილისკა. მინი სტადიონის მშენებლობაზე 17 000 ლარი დაიხარჯება; სპორტული ინვენტარის შესაძენად 8 400 ლარია გათვალისწინებული; ისეთ სამუშაოებზე, როგორიცაა სასაფლაოს შემოღობვა 26 000 ლარი დაიხარჯება; 1 500 ლარი სამედიცინო პუნქტებს მოხმარდება; სოფელ დილისკამ საბავშვო ბაღში ცენტრალური გათბობის დასამონტაჟებლად 3 800 ლარი გაითვალისწინა.
[შუშან შირინიანი, ახალქალაქი]