სოფელ მუსხში სასმელი წყლის სისტემის რეაბილიტაციისთვის 166 ათასი ლარი დაიხარჯება

ახალციხის მუნიციპალიტეტის სოფელ მუსხში სასმელი წყლის სისტემის სარეაბილიტაციო სამუშაოების ფარგლებში სასმელი წყლის წყაროები ერთ ნაკადად შეკირიბება და ახალი 3 კილომეტრიანი მაგისტრალით სოფელ მუსხში უკვე არსებულ წყალსადენს მიუერთდება. ამავე პროექტით გათვალისწინებულია მეზობელი სოფლის ხეოთისათვის წყლის დებეტის გაზრდაც.

ახალციხის მუნიციპალიტეტის გამგეობაში განმარტავენ, რომ სარეაბილიტაციო სამუშაოების დასრულების შემდეგ, სოფელ მუსხის 1211 მაცხოვრებელი სასმელ წყალს შეუფერხებლად მიიღებს.

ასევე,რეგიონში განსახორციელებელი პროექტების ფონდიდან 229 ათასი ლარით დაფინანსდა ახალციხის მუნიციპალიტეტის სოფელ სვირში სასმელი წყლის სისტემის მშენებლობაც. პროექტით სასმელი წყაროების ერთ ნაკადად შეკრება, წყლის სათავე ნაგებობის მოწყობა და სოფელ სვირამდე 8 კილომეტრიანი მაგისტრალის მშენებლობაა გათვალისწინებული, შედეგად მაღალმთიანი სვირის 550 მოსახლე ხარისხიან სასმელ წყალს შეუფერხებლად მიიღებს.

სასმელი წყლის პრობლემა მოგვარდება სოფლების - წყორძის, ახალშენის, ურაველის, ჭვინთის, ტატანისა და კლდის მაცხოვრებლებისთვისაც, სადაც სასმელი წყლის მაგისტრალური მილსადენების რეაბილიტაცია ადგილობრივი ბიუჯეტიდან დაფინანსდა.

სოფელ მუსხში მიმდინარე სამშენებლო სამუშაოები მხარის გუბერნატორმა აკაკი მაჭუტაძემ და ახალციხის მუნიციპალიტეტის გამგებელმა ზაზა მელიქიძემ დაათვალიერეს.

[თამარ თოთაძე, ახალციხე]