წაღვერში მეთორმეტე კლასელები ავარიაში მოყვნენ

ავტოსაგზაო შემთხვევა ბორჯომის მუნიციპალიტეტის დაბა წაღვერში გუშინ, 19 მაისს, დაახლოებით დღის 1:00 საათზე მოხდა. სკოლის დირექტორის ირინა ხელისუფალის განმარტებით, მოსწავლეები რომლებიც დაშავდნენ, სკოლაში "ბოლო ზარის" ღონისძიებაზე მიდოდნენ.

"ეს არ მომხდარა ე.წ "გონკების" გამო, წაღვერში სეტყვა იყო, ჩამობნელდა უცებ, ხრეშზე მოცურდნენ და ბენზინგასამართ სადგურს შეეჯახნენ. ეს არ მინდა "ბოლო ზარს" დაუკავშიროთ, ეს მოხდა ცუდი ამინდის გამო. მშობლები მოყვებოდნენ ამ პროცესიას. ბავშვებს არაფერი სჭირთ, ხვალ სამივე გამოცდაზე გავლენ", – განაცხადა სატელეფონო საუბარში სკოლის დირექტრომა.

მისივე თქმით, თავის დაზღვევის მიზნით,დაშავებული მოსწავლეები ბორჯომის სამედიცინო კლინიკაში მაინც გადაიყვანეს.

კლინიკის ხელმძღვანელის, ირაკლი დიასამიძის განმარტებით, სამივე პაციენტის მდგომარეობა დამაკმაყოფილებელი იყო და გუშინვე სახლში გაწერეს.

შსს–ში აცხადებენ, რომ მომხდარზე გამოძიება სისხლის სამართლის კოდექსის 276–ე მუხლის პირველი ნაწილით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

[თინათინ ზაზაძე, ბორჯომი]