სოფელ კოთელიის სკოლის მოსწავლეები ავარიაში მოყვნენ

ავტოსაგზაო შემთხვევა სკოლის მოსწავლეებს 30 აპრილს, იმ დროს შეემთხვათ, როდესაც სკოლიდან სახლში ბრუნდებოდნენ. 17 და 18 წლის მოზარდები „ჰონდას“ მარკის მსუბუქი ავტომობილით მგზავრობდნენ.

კოთელიის სკოლის დირექტორის, ალექსანდრე აჩელაშვილის განცხადებით, ავტომანქანა ამოტრიალდა: "ერთ–ერთს მამისთვის გამოურთმევია მანქანა, სოფელში გზას აგებენ, მოხრეშილია და ხრეშზე მოუცურდნენ".

დირექტორის ინფორმაციით, ის მოსწავლე რომელიც შედარებით მძიმედ დაშავდა, რეანომობილით თბილისში გადაიყვანეს: "ხელოვნურ სუნთქვაზე იყო, ახლა მოუხსნიათ. ფილტვები აქვს დაზიანებული და შესაძლოა ოპერაცია დასჭირდესო".

ამ დრომდე ახალციხის რეფერალურ ჰოსპიტალში რჩება მეორე დაშავებული. როგორც "სამხრეთის კარიბჭეს" საავადმყოფოში განუცხადეს, პაციენტს მხრის ძვლის მოტეხილობა აქვს: "მისი მდგომარეობა შედარებით სტაბილურია, მაგრამ, მკურნალობა სჭირდება და საავადმყოფოში რჩება. ოპერაცია უნდა ჩაუტარდეს".

საქართველოს შინაგან საქმეთა სამინისტროს ინფორმაციით, მომხდარზე ძიება სისხლის სამართლის კოდექსის 276–ე მუხლის მე–2 ნაწილით დაიწყო, რაც ტრანსპორტის მოძრაობის უსაფრთხოების, ან ექსპლუატაციის წესის დარღვევას გულისხმობს. აღნიშნული დარღვევა ისჯება ჯარიმით ან სამ წლამდე თავისუფლების შეზღუდვით.

[sknews.ge]