ბოლო ზარზე ავარიისას დაშავებული მოზარდის მდგომარეობა დამაკმაყოფილებელია

დაშავებულ მოზარდს თავის არეში მსუბუქი დაზიანებები აღენიშნება.

„სტაბილური მდგომარეობაა ახლა. კლინიკაში რჩება, მაგრამ არაფერია მნიშვნელოვანი. იყო პატარ-პატარა ცვლილებები, რომლებსაც გამოვიკვლევთ. თუ მდგომარეობა არ შეიცავალა დღეს გავწერთ“, - აცხადებენ ახალციხის რეფერალურ ჰოსპიტალში.

შსს მომხდარს სისხლის სამართლის კოდექსის 276–ე მუხლის მეორე ნაწილით იძიებს, რაც ტრანსპორტის მოძრაობის უსაფრთხოების, ან ექსპლუატაციის წესის დარღვევას გულისხმობს.

გუშინ, 20 მაისს, ახალციხეში „ბოლო ზარი“ ორი ავარიით დასრულდა. ერთი ავარია ბორჯომში, სოფელ ქვაბისხევთან, მეორე კი ახალციხეში, მუგარეთთან მოხდა. შემთხვევის შედეგად პირველი და მეხუთე საჯარო სკოლების მოსწავლეები დაშავდნენ.

ქვაბისხევთან დაშავებული მოსწავლე საავადმყოფოდან მიყვანიდან მალევე გაწერეს, მას მუცლის არეში ნაკაწრები და მხრის დაჟეჟილობა აქვს.

[sknews.ge]