აწყურთან მომხდარი ავარიის შედეგად დაშავებულთა რიცხვი გაიზარდა

ავტოსაგზაო შემთხვევა თბილისი–ახალციხის ავტომაგისტალზე, დღეს, 2 დეკემბერს მოხდა. შემთხვევის ადგილზე სასწრაფო დახმარების სამსახურის სამი ჯგუფი მუშაობდა. სასწაფოს ექიმებმა ხუთი დაშვებული ახალციხის რეფერალურ საავადმყოფოში, „უნიმედი სამცხეში“, ორი კლინიკა „იმედში“, ერთი კი ბორჯომის სამედიცინო დაწესებულებაში გადაიყვანეს.

„უნიმედი სამცხეში“ ამბობენ, რომ ერთი უკვე გარდაცვლილი იყო, ერთი მძიმე ტრამვების გამო თბილისში გადაიყვანეს, სამი კი ამ დრომდე კლინიკაში განაგრძობს მკურნალობას.

„თბილისში ყბის ძვლის ღია მოტეხილობით გადაიყვანეს, დანარჩენი სამი პაციენტის მდგომარეობა სტაბილურია“, – განგვიცხადეს ახალციხის რეფერალურ საავადმყოფოში.

ერთი პაციენტი თბილისში გადაიყვანეს კლინიკა „იმედიდანაც“. კლინიკაში ამბობენ, რომ პაციენტს თავის არეში მძიმე დაზიანებები ჰქონდა. მეორე კი შესაბამისი დახმარების აღმოჩენის შემდეგ, ბინაზე გაწერეს.

რაც შეეხება ბორჯომში გადაყვანილ დაშავებულ მგზავრს, მის სიცოცხლეს საფრთხე არ ემქურება. სამედიცინო დაწესებულების მენეჯერის განმარტებით, დაშავებული უკვე ბინაზეა გაწერილი.

შეგახსენებთ, ავტოავარია დღეს, 2 დეკემბერს, დაახლოებით 13:00 საათზე მოხდა. სოფელ აწყურის შესასვლელთან, ერთმანეთს სატვირთო ავტომობილი და ხაშური–ახალციხის სამგზავრო ‘მარშუტკა’ შეეჯახნენ. სამგზავრო ‘მარშუტკა’ ხაშურიდან 12:00 საათზე გავიდა და მას მგზავრები ახალციხეში გადაჰყავდა.

ადგილზე საპატრულო პოლიციისა და სასწრაფო–სამედიცინო დახმარების სამსახურის სამი ეკიპაჟი მუშაობდა. მომხდარის გამო, გზის აღნიშნულ მონაკვეთზე, შეფერხებული იყო ავტომობილების გადაადგილება. ათობით მანქანა საცობში ერთ საათზე მეტხანს იდგა.

შინაგან საქმეთა სამინისტრომ მომხდარზე ძიება თავდაპირველად, სსკ–ის 276–ე მუხლის პირველი ნაწილით დაიწყო, თუმცა, პირის გარდაცვალების შემდეგ საქმე გადაკვალიფიცირდა და ამჟამად ძიება მე–5 ნაწილით მიმდინარეობს, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს, რამაც გამოიწვია ადამიანის სიცოცხლის მოსპობა. აღნიშნული ისჯება თავისუფლების აღკვეთით ვადით ოთხიდან შვიდ წლამდე, თანამდებობის დაკავების ან საქმიანობის უფლების ჩამორთმევით ვადით, სამ წლამდე.

[თინათინ ზაზაძე, ახალციხე]