სააკაშვილი: ფული მოხმარდა იმას, რომ ახალციხე არ ყოფილიყო ჩამორჩენილი პროვინცია

„ახალციხეში რატომ ავაშენეთ რაბათი? მნიშვნელოვანია, რომ ყველა რაიონს ვაძლევთ განვითარების საშუალებას. ახალციხე არ უნდა იქცეს ახალქალაქის დანამატად, ახალციხე უნდა იყოს ძალიან მაგარი, ახლა ყველაფერი მოკვდა და დაიკეტა“, - ამის შესახებ მიხეილ სააკაშვილმა 22 მარტს, ვახო სანაიას გადაცემა „ღია ეთერში“ სტუმრობისას განაცხადა.

ეს განცხადება ბიზნესსა და ბიზნესმენებზე ზეწოლის ფაქტებზე საუბარს მოჰყვა.

„ხო მარა სად მიდიოდა ეს ფული? გეკითხები, მერაბიშვილის ჯიბეში?!“- განაცხადა პრეზიდენტმა მას შემდეგ, რაც ჟურნალისტმა მას სოლიდურ ფასებად ბიზნესმენებისთვის მიყიდული ქონების შესახებ ჰკითხა, - ძალიან კარგი, რომ იყიდებოდა ძვირად და ფული მოხმარდა რაბათის აშენებას, იმას რომ ახალციხე არ ყოფილიყო ჩამორჩენილი პროვინცია და იქ არ დაპატრონებოდნენ უცხოური ინტერესები. ძალიან მაგარ რაღაცას ვაკეთებდით. აუქციონებზე თუ ფული ადიოდა მაღლა, ეს იყო ძალიან კარგი, რადგან სახელმწიფოში შედიოდა ეს ფული და იქ აშენებდა რაღაცას, ასაქმებდა ხალხს, მიყავდა წყალსადენი. ასე ხდება ეს“,.

პრეზიდენტის თქმით, მათთვის ძლიან მნიშვნელოვანი იყო ახალციხის განვითარება და სამარცხვინოა, როდესაც "ნაციონალური მოძრაობის“ გენერალური მდივნის, ვანო მერაბიშვილის ჯიბრზე ამტკიცებენ, რომ რაბათი საშინელებაა.

„გახსოვთ რას ამბობდა, რომ ბიზნესმენებს აიძულეს რომ მაღაზიები გაეხსნათ რაბათში? კაი რა!“, - განაცხადა პრეზიდენტმა.

[ნინო ნარიმანიშვილი, ახალციხე]